2018休賽季補強策略 - 印第安納溜馬

籃球宅籃 於 05/05/2018 發表 收藏文章
大家好,我係籃球宅籃,90後NBA狂迷,醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話,直接入戲肉。第十八集接住講下東區球隊--印第安納溜馬。

相信大家都估唔到,Paul George 離開溜馬後,球隊竟然表現得比上季好。Victor Oladipo 重臨舊地 (母校為印第安納大學),表現有如脫韁野馬,邊個都攔唔住,幾可肯定會獲得最佳進步獎。同樣於今季加盟既Bojan Bogdanovic亦打出生涯最佳表現,場均14.3分3.4籃板。溜馬上季季後賽被騎士橫掃出局,今季可以迫到騎士打G7,實力真係不容忽視。

今夏除左入樽王Glenn Robinson III同季中加盟既Trevor Booker約滿之外,Thaddeus Yong同Cory Joseph亦可以跳出合約。幸好溜馬薪酬空間都算充裕,大概剩餘3100萬。

*Cory Joseph 近日決定不跳出合約,下季繼續效力溜馬,明年薪金約800萬美元。

先講正選大前鋒Thaddeus Yong,數據上同上季差唔多,場均上陣32分鐘攞到11.8分6.3籃板1.7個偷波,表現唔算好亮眼。場上功能主要係內線分波同籃框兩側做接應,甚少需要低位單打。下季人工約1400萬,個人認為跳出合約再尋求一紙長約機會甚大,畢竟已經29歲,下年若然有咩傷病隨時失業。不過人工方面應該唔會有太大加幅,預計年薪維持於1500萬左右。

名將之後Glenn Robinson III 效力溜馬三季以黎都無咩突出表現。上季本身一度成功搶到正選小前鋒一席,但都只有6.1分3.6籃板,未能給予教練Nate McMillan足夠信心。加上Bojan Bogdanovic既來投,Glenn Robinson III 更加只可以退居後備。已經打滾聯盟五年,仍然未能夠確實自己於隊中定位。個人覺得溜馬應該驣出位置予今年新秀,等其他人有機會表現自己。今年溜馬將擁有第23順位以及第50順位選秀權,雖然球隊過往選秀紀錄並非十分出色,但今年新秀整體實力都唔弱,希望球團可以慧眼識英雄,挑選合適球隊文化既新秀,助Victor Oladipo一臂之力。

季中加盟既Trevor Booker於常規賽中只為溜馬上陣17場,場均5.4分4.5籃板,表現尚算可以。不過個人覺得溜馬其實唔太適合使用undersize大前鋒。現時溜馬既場均籃板數目位於聯盟末段,只有49.5個。既然隊中有兩位6尺11吋年輕內線球員Myles Turner同Domantas Sabonis,倒不如多d俾機會佢地嘗試打大前鋒 (Domantas Sabonis上季於雷霆較多時間擔任PF)。透過增加整體內線高度,一方面有效保護球隊籃板球,另一方面亦增加禁區威脅,令敵隊唔敢放鬆油漆區防守,從而令Victor Oladipo同Bojan Bogdanovic更容易拉出外圍空位。今季溜馬既三分球命中同樣於聯盟中敬陪末席,只有9.1個。除左因為球隊欠缺穩定外線射手外,內線欠缺威脅亦十分關鍵。個人建議溜馬不應續留Trevor Booker,反而應該招攬一個外圍射手。

現時溜馬既輪換陣容當中係冇穩定外圍射手。全隊陣中只有正選三人Victor Oladipo,Bojan Bogdanovic同 Darren Collison 具有外線得分能力。球團非常需要一個類似Eric Gordon或Marco Belinelli既第六人,幫助第二梯隊搶分。雖然後者今夏會回復自由身,但續留76人機會好大。剛剛宣布跳出合約既Jamal Crawford算係相對容易得手既目標。雖然已經38歲,但仍然可以場均10.3分,可以填補現時後備得分能力欠奉既問題。

今季溜馬表現已經超出預期,只要搵多一兩個合適替補球員,下季一定可以走得更遠。

留言


請按此登錄後留言。未成為會員? 立即註冊
  • Kwun Fung Tse 於 05/05/2018 評論 NO. 1

    第六人有Stephenson 個人認為應該加強後備c位的禁區保護

快捷鍵:←
快捷鍵:→