2018休賽季補強策略 - 奧克拉荷馬雷霆

籃球宅籃 於 10/04/2018 發表 收藏文章
大家好,我係籃球宅籃,90後NBA狂迷,醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話,直接入戲肉。第十三集接住講下西區球隊--奧克拉荷馬雷霆。

今季雷霆再次組成三巨頭,Paul George 同Carmelo Anthony 既來投相信連雷霆既球迷都估唔到。不過個人認為成效無想像中咁理想,進攻時一係單打,一係就Russel Westbrook同 Steven Adams打擋拆,完全睇唔出有咩戰術設計俾其他兩巨頭,搞到Carmelo Anthony打到成個3D球員咁。季前重期望雷霆有機會挑戰勇士既西區冠軍寶座,時到如今應該都係火箭勇士之爭。

今夏雷霆GM Sam Presti都有排忙,除左因為兩巨頭 Paul George 同Carmelo Anthony都可以跳出合約之外,重有五位輪換球員 Corey Brewer,Jerami Grant,Josh Huestis,Raymond Felton同 Nick Collison會約滿回復自由身。
先講大家最關注既Paul George,佢今夏跳出合約尋求更高薪既合約就事在必行,事關2000萬年薪對呢位五屆全明星球員真係唔成比例,新約年薪應該大概3000萬左右。呢個問題對於雷霆黎講都幾困擾,因為雷霆今季已經要交奢華稅,下季再交奢華稅的話就要再罰重d,大概要俾多三成奢華稅。對於孤寒班主Clayton Bennett,見到今季成效不彰,肯唔肯長遠課金組巨團都係一個疑問。假設球團願意投資未來,以今季球隊表現黎睇,要說服Paul George留隊唔去湖人,教練團必先要制定一套戰術可以融合Russel Westbrook同 Paul George,否則以Magic Johnson既魅力加上為家鄉球隊作賽既榮耀,Paul George離隊既機會都幾大。

另一巨頭Carmelo Anthony今夏有權提早中止合約,雖則下季年薪高達2800萬,以一名年屆34歲既全明星球員黎講都叫做相當唔錯,但係個人認為以今季雷霆對Carmelo Anthony既重視程度,佢離隊他投既機會好大。雖然轉隊肯定搵唔番呢個人工,但大家需要明白,對於一名生涯搵左超過兩億美元既球員黎講,搵少千幾萬真係唔至在,最重要係可否爭冠。季前Carmelo Anthony同火箭一直互傳好意,但以火箭依家既陣容配置同球隊表現黎睇,相信除非Carmelo Anthony 願意好似Charles Barkley當年續約火箭咁大幅減薪,否則GM Daryl Morey都未必願意變陣去容納佢。若然Carmelo Anthony唔願意大幅減薪,以東西岸前八球隊去睇,欠缺大前鋒而又有足夠薪酬空間可以容納佢既球隊真係唔多,除左我係第五集講過既費城76人之外,重有印第安納溜馬同猶他爵士。以奪冠機會黎講,當然係76人呼聲最高,同時76人亦都有大量薪酬空間。但係個人認為若然Carmelo Anthony加盟76人都只會係短約,因為管理層最希望保持彈性,以免妨礙球隊未來發展。

其餘五位球員之中,最重要既當然係季中加盟既Corey Brewer。呢位前佛羅里達大學球員終於有機會再次同母校教練Billy Donovan師徒合作,成功打出近三季最佳成績,場均10.2分3.5籃板1.4助攻,瞬間彌補Andre Roberson因傷缺陣既空位。下季以一紙中產合約續留雷霆既機會好大。

小將Jerami Grant今季表現亦相當亮眼,命中率52.8%,場均上陣20.3分鐘攞到8.2分4籃板。好彩雷霆擁有合約匹配權,只要無其他球隊提交毒藥合約,要續留Jerami Grant完全無問題,新約年薪大概500萬至700萬左右。

老將Raymond Felton今季稱職地擔任Russel Westbrook既後備,上陣時間算唔少,年屆33歲重可以全勤出賽已經好難得。由於雷霆已經爆晒薪酬空間,要招攬球員只可以靠底薪合同或中產合約。下季一紙老將底薪續留Raymond Felton算叫做唔錯既辦法去保留輪換陣容實力。

至於Josh Huestis同 Nick Collison,個人認為唔好續留了。前者今季既命中率實在慘不忍睹,只有32.8%,上陣14.6分鐘只攞到2.3分。後者已經為雷霆效力14個球季,今季上陣時間跌至生涯新低既5.5分鐘。下季就38歲既佢為左雷霆付出左大半生,季尾退役陪家人既機會好大。

現時雷霆最大既弊病就係過份側重正選球員,不論係薪酬比例定球員數據,正選同後備既距離相差實在太遠。以今季為例,正選五人居然已經佔左1.06億美元,係整個球隊人工既八成。提提大家,今季奢華稅界線係1.19億,同時有10支球隊全隊人工係低過1.06億。當然騎士勇士既薪酬比例都十分類似,但係人地有冠軍加持,吸引到一d求冠球員願意低於市價加盟。雷霆無辦法用同樣做法吸引輪換球員加盟之餘,更加因為薪酬空間已經被大幅佔用,連希望用真金白銀招攬有實力既綠葉球員都唔得。種種原因導致到正選球員同後備球員既實力差太遠,教練Billy Donovan只可以依賴正選陣容作戰。季後賽強度更高既情況下,輪換陣容既深度每每決定球隊可以走多遠。呢個亦係點解我覺得球隊放棄Carmelo Anthony會更好既原因,多2700萬去簽入兩三位綠葉球員,對球隊整體發展更加有效。

下季雷霆將手握兩個次輪選秀權,以過往球團選秀紀錄去睇,成功揀選可用之材既機會一d都唔細。希望球隊可以好好把握,趁著Russel Westbrook 巔峰時期衝擊冠軍啦。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→