2018休賽季補強策略 - 丹佛金塊

籃球宅籃 於 23/03/2018 發表 收藏文章
大家好,我係籃球宅籃,90後NBA狂迷,醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話,直接入戲肉。第九集接住講下西區球隊--丹佛金塊。

已經四年缺席季後賽既丹佛金塊,季前以一紙三年九千萬合約簽入Paul Millsap,希望可以從而打入西岸前八。可惜今季西岸實在太瘋狂,目前頭八名球隊勝率都超過五成六。加上Paul Millsap季初缺席左四個月,令球隊戰力大減。

目前金塊排名於西岸第九位,同猶他爵士只差1.5勝場差。但係金塊餘下既十場賽事當中有九場都係挑戰分岸頭八名,反觀爵士只有六場。最終命運非常有機會同上季一樣,飲恨排名第九位,無緣季後賽。

不過即使最終金塊真係唔能夠參與季後賽,球迷亦唔需要太難過。因為金塊有三名非常優秀既年青球員 Jamal Murray,Gary Harris同 Nikola Jokic。呢三位球員將會於未來幾年擔起復興丹佛金塊既重任。筆者亦係因為呢三人而睇多左金塊既賽事,Nikola Jokic真係近年二輪新秀中天賦最高既一個。

今夏金塊將會有五名球員回復自由身或擁有球員選項,分別係 Darrell Arthur,Wilson Chandler,Devin Harris,Will Barton同 Richard Jefferson。

Darrell Arthur 今季只上陣19場,場均只有生涯新低2.8分。相信無球隊會提供超過746萬年薪合約,所以預計佢下季會繼續留隊。至於另一位同樣擁有球員選項既Wilson Chandler,今季效率依然唔錯,命中率四成半。呢位已經效力金塊七季半既正選小前鋒預計會先跳出合約再續一紙長約,年薪大概維持於1300萬左右。

對於金塊而黎講,休賽季最重要既工作係續留Will Barton。2015年金塊同佢簽訂一紙三年1100萬合約,而Will Barton近三季平均得分係14.4分,13.7分同15分。呢份合約真係堪稱全NBA性價比最高既一份。季初Will Barton拒絕提早續約,想一試自由球員市場水溫。個人認為,為左續留呢位年僅27歲既球員,一份平均年薪二千萬既合約少不了。幸好金塊擁有鳥權,可以無視奢華稅限制。不過有錢唔係大晒,球員同時關心球隊未來,金塊必須證明自己有打入季後賽既能力。所以若然今年金塊仍未能打入前八位,就真係只可以落足嘴頭說服佢信任三位年青球員既天賦。

季中由獨行俠交易過黎既Devin Harris 今夏亦會完約。暫時為金塊上陣過17場既佢表現非常穩定,場均8.2分2.4助攻,同過去幾季相若。若然Devin Harris願意留隊,可以令第二梯隊保持得分能力。新約年薪大概同今年差不多,400萬左右。

年屆37歲既老將Richard Jefferson 今季真係擔當住球員教練既角色。相信金塊簽佢個陣都唔預佢可以係場上貢獻太多,純粹想佢可以提點下班後生仔。今季金塊一共有7名23歲或以下球員,一個教7個乜都抵番晒啦。不過下季金塊未必可以再留佢啦。因為金塊手握一個首輪選秀權同兩個二輪選秀權,即使最終只簽首輪新秀,球隊都只少都要騰出一個名額出黎。上文提到既幾位自由球員當中,放棄Richard Jefferson 真係最好選擇。其實佢重入到樽,身手一d都未算老,希望下季可以繼續見到佢係NBA賽場發揮餘溫啦。

清人方面,已經被球隊投閑置散左年幾既半獸人Kenneth Faried 真係首選。效力金塊已經有7季既佢近年一直都被球隊兜售,奈何1376萬既年薪實在難以令其他球隊接手。不過由於Kenneth Faried合約中只剩下一年,金塊若然願意加入今年既兩個二輪選秀權同補償金,一D重建中球隊可能會考慮。畢竟對於重建球隊黎講,選秀權比薪酬空間重要。況且合約只剩一年,試用完Kenneth Faried 覺得唔滿意亦唔會影響球隊未來幾年動向。交易對於Kenneth Faried亦未嘗係一件壞事,反正留喺金塊都無上陣時間。

今季金塊能否打入季後賽對續留球員一事非常重要。希望球隊於未來十場比賽打醒十二分精神。今個月已經輸左俾獨行俠湖人灰熊,再輸真係唔掂。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→