2018休賽季補強策略 - 芝加哥公牛 精選 推薦

大家好，我係籃球宅籃，90後NBA狂迷，醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話，直接入戲肉。第六集接住講下東區球隊--芝加哥公牛。

自從上年賣走Jimmy Butler之後，公牛就擺到明係要劈掉重練。呢度其實我係覺得球隊有D缺乏耐性，Wade Butler Rondo呢個組合雖然係有D奇怪但係其實可行。既然三個都重有約在身，何必禁早壯士斷臂，賣走Butler再洗1800萬去waive Wade同Rondo呢。
不過一切以成過去，可幸既係公牛已經搵到重建新基石。Zach LaVine，Kris Dunn 同Lauri Markkanen 三位年青球員的而且確係潛質無限。Zach LaVine 傷癒復出後表現亮眼，場均上陣27.3分鐘攞到16.7分4籃板。同樣黎自木狼既Kris Dunn黎到公牛之後終於有更多發揮機會，場均上陣時間大增至29.3分鐘，得分由3.8分暴升至13.4分。只要持續有穩定上陣時間，今年先係新秀二年級生既佢應該可以繼續有好表現。芬蘭球員Lauri Markkanen今季亦大放異采， 成為NBA歷史上最快射入100球三分波既球員，公牛既球探真係有眼光。

今夏公牛只有三名球員完約，分別係 Zach LaVine，Noah Vonleh 同David Nwaba。續約Zach LaVine 當然係首要任務。將會於7月成為限制自由球員既Zach LaVine 預計會不乏追求者，尤其係一D未有明確重建基石既球隊如鷹隊灰熊魔術。休賽季要挽留呢位兩屆灌籃王，可能要以年薪2500萬先留得住，因為隨時有球隊開出頂薪合同去招攬佢。好彩公牛下季重有6000萬美元既薪酬空間，有大把銀彈去匹配任何合約。
Noah Vonleh 同樣會係夏天完成四年既新秀合約。已經效力過三隊球隊既佢暫未見有咩突出表現，暫時只為公牛上陣過12場，場均上陣16.4分鐘有6分6籃板。今季公牛隊中已經有8個新秀合約球員，今夏唔挽留Noah Vonleh一D都唔出奇。

如果你係湖人球迷，你應該會記得David Nwaba呢位球員。上季效力湖人既佢係一個典型苦力球員，得分唔會多但係勝在肯搏命防守。雖然今季場均上陣時間有22.7分鐘，都算受教練重用，但係下季會否續約仍然成疑。事關今夏公牛手握兩個首輪選秀權，剛步入重建階段既公牛預計應該唔會換走呢兩個First Round Picks。若然公牛選擇續約David Nwaba，15人名單就會滿額。如果公牛想於自由球員市場上搶人，就要騰空一個球員名額出黎，到時就只可以唔續約David Nwaba。

相對於其他球隊，公牛面對既球員續約問題的確比較簡單，但係公牛亦同樣要面對冗員嘅問題。今季由鵜鶘交易過黎既Omer Asik今季年薪接近一千萬，為隊中第二高，但係場均只有1.3分。你無睇錯，係1.3分。雖然對於公牛黎講，一千萬唔算得D咩，但係佢份約要到2020年先完，到時公牛重有無禁多薪酬空間真係一個疑問。
對於招攬自由球員方面，個人覺得可以係SG位簽入一名老將，一黎增加陣容深度，二黎又可以傳授經驗俾一班年青球員。Vince Carter，Jason Terry，Marco Belineli 呢幾位得分後衛今季都會回復自由身，公牛不妨可以考慮下。

下季公牛都係以培訓年青球員為主，三位基石球員究竟會提升到去一個咩高度呢，真係拭目以待。