2018休賽季補強策略 - 邁阿密熱火

籃球宅籃 於 12/03/2018 發表 收藏文章
大家好,我係籃球宅籃,90後NBA狂迷,醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話,直接入戲肉。第三集接住講下東區勁旅--邁阿密熱火。

今年熱火戰績尚算可以,暫時以36勝31負排係東區第七位。自從2016球季Wade離開熱火加盟家鄉球隊芝加哥公牛,熱火嘅組隊目標就好明確,就係以 Hassan Whiteside 同 Goran Dragic 做核心,再加一大堆藍領球員。今季熱火暫時有9個球員平均得分雙位數,實行全民皆兵,睇你守得邊個。

今夏熱火只有4位球員會成為FA,分別係兩位老將 Dwayne Wade 同 Udonis Haslem,重有兩個藍領球員 Wayne Ellington 同 Luke Babbitt。薪酬空間方面,熱火大概重有五百萬美元空間。Wade早前已經講過會留係熱火退休,因此重簽問題不大,只係唔知 Pat Riley 今次肯出幾多錢去留呢位熱火傳奇。Haslem就未知會否選擇季尾退役,若然決定繼續球員生涯,亦只會返回熱火。

所以四個球員裡面,要重點游說既球員係 Wayne Ellington。Ellington今季平均上陣26分鐘,場均11分3個籃板,係後備得分主力之一。已經30歲既佢將會係今個夏天簽生涯最後一份高薪長約,以佢今年人工六百萬美元去睇,要重簽佢至少要俾到八百萬年薪。如果熱火決定要留佢,下季就一定要俾luxury tax。

至於清人方面,其實熱火都無咩冗員。唯一可行建議係 opt-out Jordan Mickey 去減少奢華稅。

預計熱火下季應該都會以今季既陣容應戰,唔會作出咩大改動。希望來季Dion Waiters復出後可以令熱火有更好既戰積啦。

留言


請按此登錄後留言。未成為會員? 立即註冊
    快捷鍵:←
    快捷鍵:→