2018休賽季補強策略 - 紐約人

籃球宅籃 於 20/03/2018 發表 收藏文章
大家好,我係籃球宅籃,90後NBA狂迷,醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話,直接入戲肉。第七集接住講下東區傳統強隊--紐約人。

自從上季五星戰隊試驗失敗之後,紐約人又再次重建。唔講唔覺,連埋今季紐約人原來已經五年無入過季後賽。呢幾年真係辛苦Carmelo Anthony了。

今夏紐約人一共有5個球員完約或可以選擇跳出合約,分別係Enes Kanter,Ron Baker,Kyle O'Quinn,Jarrett Jack同 Michael Beasley。當中應該只有Ron Baker唔會執行球員選項,因為以佢今季場均3.5分2助攻既表現,應該唔會係其他隊搵到超過450萬年薪既合約。

土耳其中鋒Enes Kanter今季表現理想,場均14.1分10.8籃板都係生涯新高。正正因為今年打得好,估計佢季後會跳出合約爭取一紙高薪長約。Enes Kanter 今季年薪高達二千萬,所以新約年薪唔會少得過呢個數。不過重點係紐約人有意留人,Enes Kanter又有無意留隊呢?要知道一旦續約,即係奉獻自己既生涯巔峰予紐約人,幾時先可以再次打入季後賽真係無人知。Enes Kanter 已經講過G-League先係用黎發展年青球員,球隊贏波先係重點。再者,紐約人重有另一位中鋒Joakim Noah。雖則球隊就好似唔想再要佢,但係Joakim Noah都重有兩年死約,紐約人會唔會回心轉意用翻佢又係未知之數。休賽季Enes Kanter 願唔願意續約陪紐約人東山再起,真係要7月先知。

Kyle O'Quinn 今年同樣打出生涯最好表現,場均上陣17.3分鐘攞到7分5.8籃2助攻。佢既球風亦好適合紐約人,只要派佢上場就會成隻瘋狗禁搶籃板同mark人。難得合約年打出好表現,當然會想跳出合約爭取長約啦。考慮到今季人工都450萬,新既合約年薪應該大概600萬至800萬。

Jarrett Jack 同 Michael Beasley 兩位都係我幾鍾意既球員。34歲既Jarrett Jack前季因為ACL撕裂而被籃網放棄,個季其實佢打得一D都唔錯,場均有12.8分7.4助攻。可惜大傷後無球隊願意招攬佢,其間鵜鶘同佢簽左一紙十日合約,不過最後都不了了之。今季成功重返NBA並發揮老將本色,本身係非保障合約球員既佢正常黎講應該係第一個被放棄,但係佢係場上既表演實在太穩定,蜀中無大將既情況下甚至做埋正選控衛。季後同佢續約既重要性一D都唔低,多個有穩定表現既老將之餘重可以順手教下兩位年青球員Emmanuel Mudiay同 Trey Burke。

2008年榜眼Michael Beasley 初出道時真係被寄予厚望,第三年已經場均19.2分5.6籃板,可惜又係因為個人問題摧毀前途。睇佢打波其實真係好享受,佢直頭就係Carmelo Anthony 既後生版,單打技術一流,絕大部份得分都係來自肋區中距離投射。今季見到佢好似浪子回頭,場均12.6分5.5籃板係近8季新高。依家重29歲既佢今夏應該都有唔少球隊想羅致呢名昔日新星,紐約人大可以用一紙雙年合約去留佢。

同樣地,紐約人隊中亦有溢價合約,就係兩屆最佳防守球員Joakim Noah。身為其中一個大合約時代既受惠者,今季人工高達1776萬既佢今季只上陣7場,場均1.7分,重誇張過公牛既Omer Asik。重有兩年死約既佢預計唔會有其他球隊接收。若然紐約人決定放棄佢,可以選擇分五年支付其人工,每年約756萬。另一方案係說服佢買斷合約,一方面Joakim Noah 可以提早回復自由身另覓東家,另一方面紐約人亦都可以唔洗蝕咁多,重可以騰空位置出黎簽今年既新秀。但係個主動權就變左係Noah度,佢唔肯buyout真係吹佢唔脹。最後一個方案就係以不變應萬變,將佢投閑置散多一年,睇下到時有無球隊肯要佢。

不過其實成件事最吊詭既地方係若然Enes Kanter今夏決定唔留隊,紐約人陣中既中鋒就只剩低Joakim Noah 同Kyle O'Quinn (若然都無離隊),又變左Noah唔可以走。Joakim Noah既去留實在牽涉住太多人物,筆者自己都好期待究竟紐約人會點處理。

希望今次紐約人既管理層唔好再優柔寡斷,真係俾D耐性去等幾位年青球員成長。期待下季 Kristaps Porzingis同 Tim Hardaway Jr. 可以更上一層樓。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→