2018休賽季補強策略 - 多倫多速龍

大家好，我係籃球宅籃，90後NBA狂迷，醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話，直接入戲肉。第八集接住講下東區一哥--多倫多速龍。

We The North！如無意外，今季多倫多速龍將會奪得東岸分岸常規賽冠軍，係1995年成軍以黎既第一次。DeMar DeRozan 同 Kyle Lowry 組成雙槍組合六年以黎，由34勝提升到今季既53勝，勝率增加左兩成有多。速龍餘下重有11場，幾乎肯定可以打破隊史勝場記錄 (2015球季既56場)。趁著今季騎士戰力比前幾年下降，只要季後賽唔好再變班尼龍，真係有機會踏足總冠軍賽地板。
不過無論攞唔攞到總冠軍都好，今夏都係要面對補強問題。對於速龍球迷黎講，有一個好消息一個壞消息。好消息係速龍一共只有2名隊員回復自由身，分別係Lucas Nogueria 同Fred VanVleet。壞消息係速龍未來兩季都肯定要繳付奢華稅，係招攬球員方面非常有難度。

先講Lucas Nogueria，呢位巴西中鋒係四年新秀合約內一直無咩上陣時間導致表現平平，生涯場均3.2分2.8籃板1阻攻。現時隊中已經有6名新秀球員，速龍難以同時發展禁多位年青球員。個人建議若然有其他球隊報價，就唔好跟進啦。

反而令一位新秀Fred VanVleet 筆者就幾欣賞。2016年選秀會落選既佢今季受教練重用，場均上陣時間由上季既7.9分鐘增加至19.8分鐘，得分由2.9分暴增至8.3分，為隊中第六位。由於佢簽既合約並唔係新秀合約，所以今夏大可以離隊他投。若然速龍要挽留佢，最高可以出價四年3690萬既合約。
下季速龍暫時只有11份全額保證合約，若然Fred VanVleet 願意留隊，速龍都只少要招攬多一名球員以符合NBA規例。由於今季速龍並無任何選秀權，所以速龍只可以使用底薪合同 (100萬~200萬) 或稅後中產特例(500萬) 去招募球員。

今夏速龍要補強既主要係前場位置。大小前鋒都欠缺足夠既輪換球員，一旦隊中主力受傷，陣容難以調整。筆者認為，兩位騎士舊將Channing Frye同 Richard Jefferson 係唔錯既選擇。一黎兩位球員都唔會要求太多上陣時間，二黎有足夠能力穩住第三梯隊，三黎有總冠軍經驗，最重要係比較容易接受底薪合同。

今季速龍陣中最老既球員既年僅31歲既Kyle Lowry。全隊中亦只有4位球員有分岸冠軍賽經驗。兩位2016年總冠軍球員既加入雖然唔會令戰力大幅提升，但係對於平均球員年紀只有25歲既速龍黎講相當重要。筆者已多番強調老將既重要性，尤其係年輕球隊。
今季速龍已經係隊史最接近奪冠既一季，奪冠與否將會決定球隊未來組隊策略。雙核已經組隊六季，若然仍未能成功登上總冠軍寶座，球隊高層好有可能決定拆散組合。究竟多倫多速龍可否創造歷史，六月自有分曉。