2018休賽季補強策略 - 洛杉磯快艇

籃球宅籃 於 07/04/2018 發表 收藏文章
大家好,我係籃球宅籃,90後NBA狂迷,醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話,直接入戲肉。第十二集接住講下西區球隊--洛杉磯快艇。

相信季初時大家都估唔到快艇會係一季內連走兩名主力,留番低既竟然係當初最早嗌走個個。不過,Jerry West 玩既呢盤棋真係好大。依家快艇既有可造之才,又有全明星球員,最重要係一D性價比極高既交易籌碼。以目前快艇既交易黎睇,相信Jerry West並唔想重建,而係透過交易換取一D即將到期既合約或性價比高既球員。此方法一方面可以令球隊於後季(2019-2020)可以保留大量薪酬空間,亦有足夠籌碼去直接交易其他球隊既明星球員。

今季快艇一共有六名球員可以離隊,包括 Avery Bradley,Montrezl Harrell,DeAndre Jordan,Austin Rivers,Milos Teodosic同Wesley Johnson。其中Wesley Johnson應該就唔會跳出合約,因為今季表現平平,場均上陣20分鐘只有5.5分3籃板,要出去搵份高過610萬人工既合約都頗有難度。至於其他五位球員黎講,其實我覺得最重要既唔係DeAndre Jordan,反而係Avery Bradley同 Montrezl Harrel。

「無超級球星就無冠軍」依家快艇雖然有一屆全明星球員DeAndre Jordan,但係佢好明顯係唔適合當作組隊重心。加上佢今年必定會跳出合約尋求更高薪既合約,以今年2200萬人工去估算,佢可能會叫價3000萬,成為全聯盟最高薪既中鋒。你可能會覺得太高人工,但係其實Dwight Howard下季都2400萬人工,Hassan Whiteside都2500萬年薪,DeAndre Jordan話要攞3000萬其實尚算可以接受。只係對於快艇黎講,高薪續簽DeAndre Jordan並無作用。因為未來兩季快艇都處於重整期,要真正成為爭冠球隊仍然有一段時間。若然要花四分之一既薪酬空間去續簽一名全明星中鋒,只係為左打入季後賽,未免太浪費。

不過呢度要帶個頭盔先,因為若然下季快艇好似2008年既塞爾特人又或者係2010年既熱火咁,無啦啦六神合體組巨團,續留DeAndre Jordan就有作用啦。所以小總結係,若然快艇決定另覓組隊基石的話,DeAndre Jordan就唔應該留。若然Jerry West又黎神來之筆挖黎兩個巨星,續留DeAndre Joardan就勢在必行。

至於點解我話Avery Bradley同 Montrezl Harrell先係今夏續約目標,主要係因為性價比高。Avery Bradley以防守出名就大家都知,近幾季場均得分都維持係15分左右,得分能力相當穩定。唯一缺點係甚少助攻,生涯場均助攻只有1.7個,所以球隊好難要求佢係場上做串連,真係只可以要求佢防守敵隊主將。今季首次成為自由球員既佢,過去從未試過攞千萬年薪,估計新約年薪頂盡1500萬。呢個亦係我覺得快艇要同佢續約既其一原因,球員表現穩定唔會大上大落,人工又唔會佔用大量薪酬空間。最緊要係即使球隊之後決定要交易佢,亦都不乏追求者,球隊至少處於不敗之地。

今季由火箭交易過黎既Montrezl Harrel就更加係續約重點。作為火箭球迷既筆者,佢係CP3交易案中眾多球員中最唔捨得個個。佢係一個undersize既中鋒,但係得分能力一d都唔弱,係依家流行打五小陣容既時勢簡直係如魚得水。只可惜火箭陣中有另一位同樣出色既年青中鋒Clint Capela,導致Montrezl Harrel既上陣時間寥寥可數。今季於快艇擔任第三中鋒,場均上陣時間同上季差唔多,只有16.6分鐘。但係效率依舊高企,64%命中率有10.8分。若然DeAndre Jordan下季離隊,正選中鋒一席就將會由佢同Boban Marjanovic競爭,數據應該會大升。新約年薪大概600萬至800萬左右,對於快艇黎講絕對可以負擔。

至於太子爺Austin Rivers,可能好多人都覺得佢係因為老豆先有波打。我個人黎講就無咩感覺,始終NBA都係一個講實力既地方,唔係你恃住傳奇之子就可以有一席之位。以技術而言,佢真係中等水平,但係勝在夠搏命。客觀而言,佢同Avery Bradley,Patrick Beverley性質類同,贏在後生輸在防守。個人認為若然Avery Bradley願意留低,就唔好留Austin Rivers。當然啦,若然佢唔跳出合約咁都吹佢唔脹,不過佢今季得分係生涯新高,唔趁機攞高薪就真係浪費機會。

年屆31歲既新秀控衛Milos Teodosic今季黎頂替CP3,真係只可以盡力以為,始終要代替CP3根本無可能。今季場均4.6助攻已經係陣中第二高,僅次Lou Williams既5.3次。呢項數據亦都凸顯出快艇既弊病,就係無人再串連到全隊進攻。Milos Teodosic同Lou Williams都已經31歲,快艇遲早都要搵個PG接班。

今夏其實有唔少PG回復自由身,只係大多都有9成機會續簽母隊,如CP3,Tony Parker,Rajon Rondo等,所以其實可選擇既唔多。小弟有兩人選,一個係今夏成為自由身既 Isaiah Thomas。雖然佢唔係以傳球見稱,但效力塞軍既兩個球季都場均6個助攻,更重要既係佢得分能力比Milos Teodosic強更多,生涯場均18.9分,足足高Milos Teodosic一倍。防守上因為身型問題無可奈何係會輸蝕d,但係快艇外線有NBA防守一隊既Patrick Beverley,禁區有巨神兵Boban Marjanovic,已經算最大限度減低Isaiah Thomas既防守漏洞。

之於另一PG人選,個人認為可以免除快艇未來幾年PG人選既擔憂,呢個人就係黃蜂既Kemba Walker。今年27歲,下季將會係合約年既Kemba Walker已經效力左黃蜂7年,但係只打入過兩次季後賽,相信佢自己都唔滿意,今年亦再次傳出球員希望離隊既消息。若然球員向球隊表達完約後唔會續約既意願,相信球隊都唔想兩手空空,情況就好似Paul George一樣。依家快艇手上就揸住一大堆交易籌碼,要換入只剩低一年約既Kemba Walker真係易如反掌,係睇下球員自己肯唔肯姐。若然Kemba Walker肯加盟,正如上文所言,快艇就需要續留DeAndre Jordan。

今夏快艇一定會於休賽季有大動作,以Jerry West極度好勝既性格,絕對唔會容許球隊連續兩年缺席季後賽。加上手揸一手好牌,真係好期待今次Jerry West又會為快艇挖黎咩明星球員。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→