2018休賽季補強策略 - 金州勇士

籃球宅籃 於 12/05/2018 發表 收藏文章
大家好,我係籃球宅籃,90後NBA狂迷,醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話,直接入戲肉。第二十集接住講下西區球隊--金州勇士。

受隊中多名主將因傷缺陣影響,今季勇士戰績未有如過去幾季般驚人。不過值得一讚既係,輪換陣容球員都能夠適時跳出拯救球隊。最驚喜莫過於奇兵Quinn Cook,成功把握Stephen Curry缺席既機會,多番上演得分秀,為自己贏取一紙新約。

來季勇士將有多達六位球員完約,當中更加有四位係大前鋒/中鋒,球隊必須作出取捨,否則四五號位置將會人滿為患。Kevin Durant亦已跳出合約,不過球員表明來季會重返勇士,跳出合約只為球隊於今夏有更彈性既薪資空間進行操作。對於勇士而言,由於嚴重受奢華稅影響,球隊只會願意以利用底薪合約或中產條款去招攬自由球員。個人預計勇士來季會限制球員數目至聯盟下限既十三人,以進一步減少薪酬開支。

年青中鋒Kevon Looney今季得到不少上陣時間,球團明顯希望幾位年青球員可以互相競逐正選中鋒一席。畢竟其餘幾位中鋒包括Zaza Pachulia,David West以及JaVale McGee都已經超過30歲,球隊有必要為未來發展鋪路。教練Steve Kerr表示Kevon Looney非常適合打五小陣容,因此球員於季後賽被委以重任,九場比賽場均上陣21分鐘,有5.1分4.6籃板。上年勇士為左減輕奢華稅負擔,決定不執行球隊選項,令Kevon Looney來季將成為自由球員。呢個操作顯示出除非球員願意底薪或非鳥權留隊,否則勇士唔會勉強挽留。

正選中鋒Zaza Pachulia雖然因上陣時間少左而令到數據有輕微下降,但場上效率依舊理想。56.7%兩分命中率,80.6%罰球命中率皆為生涯新高。續約唯一問題在於薪金方面。球員於去年夏天堅拒簽訂老將底薪合同,要求得到年薪更高既非鳥權合約。今年Zaza Pachulia更將有早鳥權資格,最高年薪可達六百萬,未知雙方會否再一次就薪金上有爭議。個人認為隨住球員於隊中重要性下降,若然球員叫價高於非鳥權合約 (約420萬),倒不如投資於年青中鋒Kevon Looney身上。
同為中鋒既JaVale McGee今季場均上陣時間與前季差不多,只有9.5分鐘。不過場上防守依然有阻嚇力,加上定期上演精彩灌籃提升球隊士氣,個人覺得若然JaVale McGee願意接受底薪合同,球隊應該與球員續約。

其實於一眾自由球員中,個人覺得老將David West係最適合勇士體系。只可惜生不逢時,若然年輕十年,佢就可以於五小體系中充份運用自己高效既中距離射術,出眾既高位傳導眼光以及不輸其他高大中鋒既籃板能力。今年已經38歲,若然球隊最後順利奪冠,球員宣布光榮退役機會頗大。

季前以一紙中產合約加盟勇士既Nick Young 成功扮演第六人角色,今季場均7.3分,為輪換陣容提供不少火力。球員近三季開始大幅提升三分起手比例,一方面當然因爲潮流所趨,另一方面亦同體能逐漸下降有關,畢竟今年就33歲,無辦法如早年一樣飛天遁地。個人認為只要球員更細心選擇適當起手機會,並且投放更多心力於防守方面,將可以成為勇士未來幾年既主要輪換球員。今夏續約唯一障礙依舊係薪金問題,幾可肯定球隊唔會願意繼續給予人工達520萬既合同。相信球隊會盡力以奪冠大熱身分勸誘球員減薪留隊,減輕奢華稅負擔。

早前於比賽中受傷既小將Patrick McCaw明顯被球隊寄予厚望。即使球員今季報銷,球隊都寧願放棄Omri Casspi,堅持留下Patrick McCaw,只為令球員今夏成為RFA,令球隊可以擁有合約匹配權。由於球員受傷關係,今夏未必會吸引到好多球隊報價,球隊好大機會以非鳥權續留球員。

至於交易方面,相信以下提議可能有爭議,就係要清出Shaun Livingston。若然站在球隊角度考慮,其實此事勢在必行。主要原因有二,其一為球員重要性下降,其二為球隊需要更多薪酬空間以續約主將Klay Thompson。今年33歲既Shaun Livingston於去年簽訂一份三年2400萬合約。由於球員為球隊兩次奪冠貢獻良多,球團願意於薪酬空間爆滿情況下獎勵球員。但意料之外既係,奇兵Quinn Cook今年表現非常好,教練Steve Kerr當然更樂意起用佢,變相令到Shaun Livingston上陣時間減少。今季球員場均上陣時間只有15.9分鐘,為加盟勇士以來最少。若然Patrick McCaw成功續約,預料Shaun Livingston來季上陣時間會更少。雖然球員效率與上季差不多,但隨著出場機會逐漸減少,合約性價比只會愈來愈低。再者球隊亦要為後季續約Klay Thompson作準備,近期消息指出球員有意提早續約,並且願意自降薪金,約四年9200萬。若然到時Kevin Durant仍在陣,四位全明星主將加重要輪換球員Andre Iguodala既薪金將高達1.25億,非常貼近奢華稅界線。兩項因素令球隊好有可能迫於無奈將Shaun Livingston送走。今季勇士擁有第28順位選秀權,亦係球隊最好既交易籌碼,球團好有可能將此選秀權搭配球員一併送走。

球隊陣容基本上已大致完備,只要成功與部份替補球員續約,未來幾年會繼續成為奪冠大熱。

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→