2018休賽季補強策略 - 密爾瓦基公鹿

籃球宅籃 於 10/06/2018 發表 收藏文章
大家好,我係籃球宅籃,90後NBA狂迷,醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話,直接入戲肉。第二十四集接住講下東區球隊--密爾瓦基公鹿。

今季公鹿再次首輪遊相信令不少球迷失望,畢竟Eric Bledsoe既加入以及Jabari Parker既復出理應可以帶領球隊走得更遠。球隊管理層最近任命前鷹隊教練Mike Budenhoizer為新任教頭,希望呢位2015年最佳教練可以為球隊帶黎新景象。

今夏公鹿一共有四名球員回復自由身,包括Jabari Parker,Brandon Jennings,Shabazz Muhammad以及Jason Terry。球隊暫時剩餘1800萬薪酬空間,要留待11月先可以向聯盟申請豁免Mirza Teletovic既薪酬開支。球員去年發現肺部出現血栓問題,被迫無限期停賽,其後被球隊放棄。來季球員薪金約1000萬,若然球隊於11月成功申請豁免,可以大大減輕球團財政負擔。
今夏球隊首要任務就係續留大前鋒Jabari Parker。上季球員因十字韌帶撕裂而需要休養一年,今年二月復出後表現不錯,場均有12.6分4.9籃板。今夏將完成新秀合同,成為受限制自由球員。由於球員過去有不少傷患紀錄,相信會影響其他球隊報價。個人預計新合約大概介乎1500萬左右。

來季就41歲既噴射機Jason Terry已經於NBA賽場征戰十九年,但身手依然不錯,仍然可以場均上陣16分鐘。Eric Bledsoe加入後,公鹿已擺明車馬要於季後賽有一番作為。老將Jason Terry對球團既作用性就更大,畢竟球隊十分年輕,全隊只有Jason Terry一人超過三十歲,係季後賽呢種高壓賽事中有團結球隊既作用。希望來年仍然可以見到噴射機於NBA飛翔,為隊中其他年輕球員做榜樣。

三月才加盟球隊既Brandon Jennings同Shabazz Muhammad都只為公鹿上陣十多場,要定斷是否適合球隊配置仍言之尚早。即使前者於季後賽中頗受重用,但新教頭Mike Budenhoizer是否有同樣看法都係未知之數。筆者本人其實幾睇好Brandon Jennings可以成為一位稱職既第六人,個人認為Brandon Jennings攻強守弱既球風比起另一位後備控衛Matthew Dellavedova更加適合帶領公鹿既第二梯隊,於球隊主力休息時為球隊幫手搶分,避免因缺少進攻點而被對手拉開比分。公鹿大可以先與球員簽訂一份非保障合同,觀察Brandon Jennings於夏令營既表現再作打算。真心希望呢位公鹿舊將可以重拾昔日風采,今年先28歲既佢應該仍有不少進步空間。

如無意外,公鹿來季主力陣容應該與今季相若。John Henson (C),Jabari Parker (PF),Eric Bledsoe (PG),Kris Middleton同Giannis Antetokounmpo都可以擔任SG或SF。因此,公鹿今夏要做既就係強化輪換陣容,尤其係三四號位,目前公鹿於呢兩個位置都欠缺可靠既輪換球員。個人認為Jeff Green會係一個唔錯既選擇,常規賽上陣23.4分鐘得10.8分3.2籃板,球員於季後賽亦已證明自己大賽能力。來季32歲既Jeff Green可以擔任大小前鋒位置,令球隊於輪換時有更彈性選擇。

Jabari Parker復出後,Tony Snell勢必要回歸後備。幸好公鹿既薪酬空間都算控制得唔錯,暫時未需要做salary dump既動作。不過由於球隊需要簽入今屆選秀會第十七順位新秀,所以球隊需要清出一個球員名額。中鋒Tyler Zeller來季屬於非保障合約,加上成績又普普通通,照理應該會被球隊放棄。

隨着Giannis Antetokounmpo驚人既成長,加上Mike Budenhoizer既來臨,公鹿既戰績應該會繼續進步,期待來季球隊可以同其他年輕球隊如76人或塞爾特人一樣有好成績。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→