2018休賽季補強策略 - 亞特蘭大鷹隊

大家好，我係籃球宅籃，90後NBA狂迷，醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話，直接入戲肉。第二十三集接住講下東區球隊--亞特蘭大鷹隊。

球團於去季季尾決定重建，頓時由季後賽球隊變成東岸包尾大幡。以首年重建而言，戰績確實令人「滿意」。近期傳出主將Dennis Schroder將於一星期內會見球隊總經理及班主，主要談論球員未來動向。Dennis Schroder已表明唔希望於巔峰時期留待於一支重建球隊，甚至點名提及溜馬同公鹿兩支季後賽球隊，預計離隊機會非常大。
今夏鷹隊一共三名球員回復自由身，另外有兩位球員可跳出合約。來季薪酬空間則距離奢華稅水平尚有5300萬，球隊同時手持三個首輪選秀權 (3rd, 19th, 30th)。

先講正選中鋒Dewayne Dedmon，季初自由身加盟鷹隊，上陣時間比上季於馬刺為多，場均上陣24.9分鐘，交出10分7.9籃板既成績。今季人工只有600萬，性價比頗高。今年29歲既佢，理應不屬於球隊重建藍圖中，預料會跳出合約並離隊他投。但由於大部份球隊先前都已經花費重金於中鋒位置 (聯盟中有16名中鋒年薪過千萬，當中有7名常規賽上陣時間少於750分鐘或先發上陣場數少於10場)，加上今夏有不少中鋒約滿回復自由身，預計Dewayne Dedmon來季薪金加幅不會太大。
同為中鋒既Mike Muscala今夏同樣有球員選項。球員今季場均上陣20分鐘，攞到7.6分4.3籃板。若然Dewayne Dedmon離隊，Mike Muscala會有更多上陣時間。來季原定薪金約500萬，留隊機會頗大。

替補控衛Malcolm Delaney生涯前五年都於海外聯盟打拼，曾贏得德國、法國以及烏克蘭聯賽冠軍。前年與鷹隊簽訂一紙兩年合約，首次於NBA賽場上陣。近兩季球員上陣時間都較少，只18分鐘左右。今季場均得到6.3分3助攻。鑒於上陣機會受限制，球隊又追求年輕化，唔排除球員選擇離隊，繼續於海外聯賽發光發亮。

三月中簽約加盟鷹隊既兩位小將Damion Lee及Jaylen Morris預計來季都不獲續留，一方面因為球員表現平平，更重要係球隊需要球員名額簽入新秀及接收溢價合約。
球員交易方面，正選控衛Dennis Schroder無奈地必須清出。公鹿已經有Eric Bledsoe所以加盟機會頗微。另一邊廂既溜馬反而機會較大。30歲既正選控衛Darren Collison今季場均交出12.4分5.3助攻，不論數據或年紀都被Dennis Schroder比下去。加上Darren Collison只剩餘一年合約，溜馬有必要尋求替任人選。預計交易案會係溜馬以今年第23順位選秀權，第50順位選秀權及Al Jefferson 向鷹隊提出交易。

今夏球隊首要任務係透過選秀會選出重建基石。今屆選秀會有不少優質長人，鷹隊大可以透過探花簽選入一名優秀中鋒以作補強。若然太陽決定選入Luka Doncic，帝王又已有中鋒Willie Cauley-Stein，鷹隊有機會得到DeAndre Ayton。另外，由於Dennis Schroder大有機會離隊，球團亦需要再培育一名新秀控衛。

預料鷹隊於休賽季中唔會有太大動靜，球團已表明會透過選秀會重整旗鼓。若然球隊成功以Dennis Schroder換取選秀權，鷹隊好可能於今年內成功組建球隊未來核心。