「比啲態度黎睇下好喎」 精選

其實各位覺得作為球員最重要嘅係咩野? 係能力(射得準)? 係身材(冷氣球皇嘅坦克身材)? 定係技術 (Crossover)? 筆者就認為係不放棄同願意努力嘅心態(高比叔勤力不放棄嘅態度)。即使你矮、技術有限、無咩天賦或者球隊中無咩特別長處都好，只要抱住努力唔放棄嘅心態，點都會有進步同埋得到別人認同嘅一日，因為心態就係一切。
帶番個頭盔。我唔係話技術、能力、天賦同身材個啲唔重要，呢啲野當然重要，但更重要嘅係你對待籃球，對待一隊球隊嘅心態。
每個星期嘅練波就如例行公事，練習內容百變不離其中。一開始，大家一定係好踴躍出席，齊人練波? 學達哥咁講:「其實唔難!」之後，總有啲隊友又開始嫌Book嘅體育館太遠，個室內場又離地又幾百米，開始出現遲到情況喇。篤個魚蛋又話唔黎、昨晚通完頂之後又飛機。結果就少出席(練唔到黎睇下都好喎師兄)，跟唔上進度繼而開始hea練，浪費曬啲練波嘅時間同機會。比賽個時少落場，時間少，又唔開心點解出得咁少甚至無得出。(咪就因為操守問題同埋你唔熟隊波囉)
‘I'm not like those people that just ignore and play in practices; and hope myself to do well in a game.’—Michael Jordan
我不是那種練習時敷衍了事，卻希望自己在正式比賽時，能打出好成績的球員。-- Michael Jordan

以上只不過係一個事列，好可能係各位大大(讀者)身邊都出現過。
每個人打籃球都會遇到樽頸位，即係卡關喇。但點解有啲人，明明一開始能力差過你、身材又無，又或者個位大大(球員)原本同你嘅實力相約。
但過左一排之後(可能一年，又或者係幾個月)，有一日你地咁啱一齊打波，突然發覺佢進步左好多，唔再係以前甩手甩腳嘅佢。佢嘅眼神，支體動作都唔同曬，完全唔似係一個初哥或者打籃球唔叻嘅人嘅表現。

然而，總有啲人唔肯認同別人嘅努力，佢都係有人帶住佢練先咁勁姐、如果我都有入隊或者有人帶嘅話?到時我實勁過佢!

容許我直接啲咁講：唔好比咁多藉口自己喇好嗎?人地係你練波hea緊個時，已經跑多你幾個圈；係你仲掛住係屋企玩電話個時已經射多你幾百球喇。
唔好怪自己嘅遭遇唔好，唔好怨天，又怪嘅就怪自己唔夠人努力。
事出必有因，唔好話教練針對落場少，唔好話人地好彩，先反省自己有咩問題。

大大們，一班人打籃球，最想要嘅就係一齊進步，一齊享受suicide(自殺)完抖唔到氣嘅感覺，一齊享受贏波嘅快感同輸波嘅失落。

當然，每個人都有想放棄嘅時候，小弟我都唔例外...

但係你唔想起身練波，或者有練波偷雞嘅想法出現個時，諗一下你隊友付出過嘅汗水。睇到你隊友咁努力練波，你都唔應該咁易放棄，比啲態度黎睇下!



還有，喜歡小弟文章的話可以讚好我的Facebook專頁，以作支持
https://www.facebook.com/Ckin97/