資源投放

pro-9upper 於 27/05/2016 發表 收藏文章
以下使用口語,希望FIT到本地人

唔知各位大大中學時有無入校隊,相信每間中學都會為唔同嘅科目設定一啲資金上限黎應付日常運作。

每間學校嘅校隊勁嘅野都唔同,有啲係排球校隊勁,有啲就足球或者籃球勁。正因如此,能夠為學校爭取到獎盃、名次嘅校隊就可以Claim到大部分嘅資金。相反其他想Claim番報名費、波衫錢嘅校隊就比較難喇!

唔知各位大大中學時有無入校隊,其實中學都會為唔同嘅科目設定一啲資金上限黎應付日常運作。體育科方面都係一樣。

當然,每間學校嘅校隊勁嘅野都唔同,有啲係排球校隊勁,有啲就足球或者籃球勁。
正因如此,能夠為學校爭取到獎盃、名次嘅校隊就可以Claim到大部分嘅費用。相反其他想Claim番報名費、波衫錢嘅校隊就有啲難度喇,因為資金的確有限。

學生 / 校隊想要更多資源去買器材、請教練;學校就要求你有表現我先肯投放資源比你。對於一啲新隊,或者表現未及其他隊伍嘅校隊就難搞喇!又要我有表現,又比唔夠資源發展,真係比你玩曬。
呢樣野呀,仲難答過有雞先定有蛋先呀!
(題外話,科學家好似已經搵到呢條問題嘅答案。想知可以上網搵)

然而,我明白要營運一間學校要顧及好多方面嘅因素,好多野都要申報同規劃。
如果間中學係無咩盈餘嘅都無計,因為啲錢可能拎黎應急或者Keep番係度,都無辦法用到筆錢去幫助其他學科發展;但如果間中學有好多盈餘,放係度又唔用(又唔係用黎翻新、買其他野),咁就真係唔得喇!

可能大大會話:「車,咁大把人無教練無器材都可以打到好表現喇!睇你有無心練嘅姐!」。帶番個頭盔,咁你講得無錯,無教練無器材的確可以有好表現,但係「佢地」嘅協助下成效反而更大。

學生Hea練,又唔團結,學校投資少都係正常嘅。但有啲校隊,係中游份子,明明能力唔差,偏偏學校無咩點投放資源比佢地,發展平平。
但舉個例,好似籃球校隊咁,練波你可以話「練野睇片自己跟住練咪得」
老手有一定籃球知識咁都可以,但如果係C Grade嘅新仔呢? 新人就好似一塊海綿,你教幾多佢就吸收幾多,教練就可以幫到佢地學習一啲最正確嘅姿勢同籃球概念。再者,教練好多時唔只會教你籃球上嘅知識,更重要係教導學生係籃球中所學懂嘅待人處事嘅態度,以及一啲人生道理。

「你又可能講,咁搵學校個體育呀Sir幫手教,或者叫啲B / A Grade 幫手教囉,咁咪仲團結。」算你又講得有Point,但中學老師本身都多野做,可能已經教緊其中幾隊校隊,未必有太多時間黎教你,工作量咁大未必負荷到;B / A Grade自己本身都要練波,過黎教波個時可能已經甩左自己Grade嘅進度。

再者,籃球校隊所需要嘅器材最基本梗係籃球同埋個場喇,學校波殘唔緊要,隊員可以自己帶私家波,但係個場就難搞,你無理由起左唔鬼保養呀大佬。
迷之聲︰「去學校格離個街場練咪得」
大佬呀,呢隊係籃球校隊呀,唔係出面啲球隊呀,你話我加操要自己出去Book場就話姐,平時放學練波,最方便就係學校個場,如果學校唔近市區無街場,過去又曬時間(唔洗番屋企do homework同溫書咩而家),一陣街場仲可能無位。學校個場上體育堂又用,小息又有同學仔打波,整一次個場,大家都有好處。
再者,學校可以維修完個場,要求番校同學用完幫手清潔番,提高番學生嘅責任感,又可以令佢地更加愛惜個場。

黎個總結,其實我9up咁耐,都係希望學校可以投放多啲資源比學生支持佢地嘅興趣,學校嘅支持,係學生嘅動力。有時就算努力,都要靠環境同其他因素幫助先有用。亦都希望咁多位讀緊中學又有打波嘅大大唔好放棄,即使別人唔睇好你,堅持落去,你嘅努力總有一日會得到肯定。

(圖片均來自網絡) (以上係小弟9UP,勿認真)(歡迎大大討論)

留言


請按此登錄後留言。未成為會員? 立即註冊
快捷鍵:←
快捷鍵:→