我的MJ-高比叔

pro-9upper 於 02/03/2016 發表 收藏文章
「高比有排都未退休喇!至少再打多三至五年!」呢句野係我在kobe第18個球季傷愈復出嘅時候講嘅。

曾幾何時,我也幻想過高比有機會同LBJ係Final對決;幻想高比可以拎到第六冠同MJ齊名;幻想佢會打超過20年NBA。

事實証明以上都只不過係我嘅幻想,沒有成真。08-09季後賽由LBJ領軍嘅騎士輸左比Howard帶領嘅Magic,無緣睇到Final Kobe同LBJ呢個23VS24嘅對決;12-13球季猢人 (好似高登寫法,除非唔係) 得到Howard同 Nash之後係季後賽以4-0被Suprs橫掃;15-16球季高比更宣佈係本賽季結束後退役。

高比呢二十年嘅職業生涯可以話係陪伴我成長。係我睇波嘅「波齡」入面,有幸見証佢「24」時代嘅二連霸、超越Jordan成為史上總得分第三位同明星賽嘅得分王、一次又一次嘅絕殺…

而佢唯一敵唔過嘅野,就係時間嘅洗禮。距離KOBE退休只係得番廿幾場波;換句話講,我地只可以睇KOBE係NBA打多廿幾場(無計,猢今季都無咩可能入到Playoff,唔係嘅話都可能睇多幾場)。

係NBA,每個時期都會有一個主宰球賽嘅超級球星出現。上個年代嘅籃球之神MJ,我90後年代嘅KOBE,到00後嘅LBJ (而家當然係咖哩仔最hit la)。Kobe退役的確可以話係一個時代嘅交替,見証住三個時代嘅傳承時刻。由84年MJ一代傳授比96年KOBE一代再交比03年LBJ一代繼承。

80後成日都話無親眼睇MJ打NBA係一種損失 (所謂嘅「親眼睇」當然唔係叫你飛過去睇喇,LIVE姐)。無錯,我地呢啲90後無法親眼見證MJ最強勢嘅時期,只可以上網睇片。但係我有機會睇到Kobe打NBA,佢就係我呢個時代嘅MJ。接近一樣嘅Fade away,吐舌嘅表情,奪冠後興奮到跳起嘅動作.....

但對我地而言,KOBE就係我地90後嘅MJ。kobe嘅退役就好似MJ當年退休一樣,我地對Kobe嘅不捨就好似你地對MJ個時嘅感情一樣。

轉眼間佢都已經38歲,唔再係當年可以飛天遁地嘅小飛俠;由當年嘅狂妄自我,變成而家多左一份滄桑嘅成熟。連佢自己都話:「我的精神可能承受磨難,但無奈我的身體很誠實:是時候,說再見。」 ’My Mind can Handle the Grind, but my Body knows IT’S TIME TO SAY GOODBYE’ – Kobe Bryant.

二十年來,佢已經証明曬所有野:
5 times champs
2 times FMVP
18 times All Star
4 Times All Star MVP
81 Point Game…
餘下嘅職業生涯,無需再証明啲乜野,好好咁享受打籃球嘅快樂就夠。

MY Instagram: pro9upper
標籤: kobe  退役  MJ  

留言


請按此登錄後留言。未成為會員? 立即註冊
    快捷鍵:←
    快捷鍵:→