千禧 Vintage: 分手會因愛成恨, 睇波卻會因恨成愛......

NBA大排檔 於 20/10/2017 發表 收藏文章
呢篇野唔係講NBA之中有邊對基情拍檔, 而係談談小篇睇波既「因恨成愛」既經驗

1998 年, 相信唔少 Utah Jazz 既球迷都好不容易等到 Micheal Jordan 再度言退, 心入面唔多唔少都會覺得: 「仲唔輪到我地威」? 點知殺到入季後賽, 面對 Portland Trail blazer, 簡直係一盤冷水照頭淋......
當年最記得既畫面, 係睇住 Karl Malone 同 R.Wallace 肉博, 隔住電視都感覺倒佢既無力感......

當 Trail Blazer 換入 Brian Grant --- 當年識佢老鼠既我, 心諗: 「(飛雲!) 機會黎喇!」
但意想不到地, 呢個泥水佬藍領, 招呼得 Karl Malone 貼貼服服。詳細而又具體既形容: 爆-唔-入。

最後 Utah Jazz 被4-2 踢出局。而 Karl Malone 呢個系列賽既成績表:
Points per 48 mins 由常規賽既 30.5 滑落至 23.5, 命中率亦由49.3% 下降至43%......

呢個系列賽完左之後, 於我腦中留下最深印象既, 就係名不經傳, 克制 Karl Malone 既苦力藍領球員: BRIAN GRANT。


時間一轉眼, 黎到2004年既季後賽。2000 年代西岸競爭既激烈程度不下於今日。
而 Dallas Mavericks 擁有 Big 3 (Finley, Dirk, Nash) 既時期, 雖說不上係爭冠大熱, 但可算係黑馬勁旅。Mavericks 既節奏明快, 高佬三分, 有前冇後既打法亦吸引左我既支持。

首輪賽事, 踫上帝王五虎。

今日, Dirk Nowitzki 已成為 Maverick 既代名詞, 但其實當年, 由 96 年開始效力既Micheal Finley 先係球隊既老大哥。

當系列賽開打, Finley 所面對的, 一啲都唔尋常 - 三分線內不能觸球, 觸球後完全被緊貼, 不被放投, 但切入亦被快速移步阻斷。整個系列賽 Finley 只投入三數個 Tough Shots, 偶有機會上罰球線多取一兩分......

該系列賽, Finley 既成績表 (括號內為常規賽數字): Point per game: 13 (18.6), FG% 38.2 (44.3%), 3pts FG% 26.9 (40.5)

令 Finley 動彈不得既球員係: DOUG CHRISTIE


該兩個系列賽之後, Brian Grant 同 Doug Christie, 成為筆者重點觀賞既球員, 經時間沉澱, 佢地成為筆者其二最欣賞既球員。作為球迷, 睇見自已鐘意既球隊主力被守死, 第一個反應好可能係痛恨對手。當時筆者都唔例外。但有時候正正就係因為對自己球隊或球員既支持, 先會令自己更能夠體會到對手既實力同拼勁, 由此亦可能引發出對對手既欣賞, 由「恨」, 轉為「愛」。

而呢兩個綠葉球員, 亦令筆者不再單看球星, 不再忽視藍領球員的重要。亦明白到得分以外, 一個球員如何可以幫助球隊勝利。

中學年代既年青人, 打法永遠只有一個: 諗辦法得分, 無去路就傳球。筆者亦係由欣賞呢兩位球員開始, 明白到「波並唔係咁打既」。

大家睇波既時候, 不仿留意一下自己內心對對手既「恨」。可能他日, 你會發覺其實自己某個角落, 都對佢有一份欣賞。

如果喜歡我們的文章,請即分享到︰

標籤: #NBA  #MAVS  #KINGS  

留言


請按此登錄後留言。未成為會員? 立即註冊
    快捷鍵:←
    快捷鍵:→