【不打不相識】籃球？梗係去到邊打到邊啦！ 精選

話說，尋晚响油麻地等人，有成兩個鐘無嘢做，咁啱又有個鴉打街球場（即係花園酒家嗰到），就走咗入去。


一開頭無人，無所謂，我就慢慢影下相，諗下黎緊有乜好寫。過咗十分鐘，有三個人帶住兩個波入黎——「yes～唔洗咁悶！」

佢哋三個都係南亞裔嘅後生仔，有一個特別nice，姑且叫佢呀P（左邊嗰個），我都未開聲，佢就主動交個波過黎俾我射。另外兩個初頭就Cool啲，我叫佢哋做呀S（無入鏡）同呀A（右邊嗰個）啦。

呀P唔算高，18歲，好大隻吓，技巧雖然有啲粗糙，但為人謙厚，會主動求教。佢唔係好識走籃，尤其係左手，咁我就簡單教下佢步法，但搞笑嘅係，佢識左手射波（！），雖然無乜拋物線，但居然準過用右手。我問佢係咪左囿（即係左撇子），佢又話唔係。過程中，我射入親佢都一定再交波俾我，甚至射唔入都會，後尾有個佢識嘅波友黎咗，嗰個人就唔興畀Bonus人，呀P得意到專登搶番個波交畀我，同我講“I don't like that guy. No respect.”，仲對住嗰個人嗌“Hey! Respect! Where's the respect!”
呀S係印度人，點解我知？因為佢同呀A玩三分大賽嗰陣，連入咗三球三分（佢射波嘅動作幾得意，有機會再講）之後响到叫囂話自己係Curry，呀A就同我講"He can only be Curry, coz he is an Indian”。佢16歲，但我諗佢有180cm高，手長腳長，打波嘅風格同動作，一睇就知係學Professor，仲好鍾意trash talk。佢同呀P 1 on 1，玩到呀P陀陀擰。呀A就話佢“He has all the moves, but he never finishes"。又真係，佢係鍾意好似Steve Francis咁，過你一次唔夠皮，要番轉頭再過多幾次先滿意咁鬼衰格。

Professor嘅打波style

Steve Francis「落你一次面邊夠喉，四次就差唔多」

呀A同呀S英文都好好，呀P就麻麻地。呀A好健談，又問我幾歲，又問我有無讀大學，又問我而家做乜，又問我係咪日日打波。言談間，我feel到佢有種無力感，覺得自己讀書差，第日無乜前途，想做醫生、編輯，但又唔夠聰明。突然，熱血嘅籃球場多咗一陣冷意。我只能夠答佢一兩句意義不大嘅鼓勵說話，希望佢唔好放棄，努力向上啦！
好快我都夠鐘要走，可以咁樣藉住籃球識朋友，仲要係唔同族裔嘅人，真係好有意思。籃球嘅魅力就响呢到，雖然其他運動都有呢個效果，但我認為籃球係特別犀利，特別容易做到呢個效果。本身諗住hea下唔好出咁多汗，結果都係成件衫濕哂，無計，鍾意打波就係咁！相信會睇到呢到嘅朋友一定明白！

最後，誠邀各位黎like我個page 說籃！