【激死人系列】射唔入，其實真係唔緊要，可唔可以守波？ 精選

（試想像）

你响外圍拉開空間畀個隊友打isolation（因為明知佢唔會交波），佢一個Crossover過咗前面條友，跟手一個靚轉身，再駁多個Fade Away兼Second Time，避過補位嘅block shot⋯⋯
——框！

（抱頭大叫）「X！咁都炒！？」

對手極速出圈，一下狡猾嘅直塞，內線空哂，輕鬆籃底兩分搞掂。

回頭一望，呀隊友仲抱住個頭，沉醉响佢絕妙嘅fade away second time居然炒粉嘅情緒入面⋯⋯

無錯，今日想講嘅就係，打波、尤其係打街場一個常見嘅現象，簡單黎講係——射唔入、嗌生哂、唔守波、輸多球。

喂，好簡單，邏輯問題，鬥波點先贏波？係鬥快入夠一個分數呀嘛。咁好合理黎講，除咗要得分，就係要阻止對方得分啦。
你射唔入，都尚算無可厚非，Curry都唔係百發百中啦（雖然都唔差得遠⋯⋯）；但唔守波，被人拎easy two甚至three，就真係㷫過火屎。你諗下，Harden進攻咁勁，眼神防守都人笑到臉都黃啦。呀隊友你算老幾？（講開又講，睇NBA我最憎就係見到啲球員攻唔入，掛住對個球證呻，結果被人打快攻或者五打四）

Harden嘅「精彩」防守

Otto Porter嘅「精彩」防守

當然，問題其實唔只在於嗰兩分或者三分，而係真係好洩氣，尤其對於嗰啲認真防守，真心想贏嘅人黎講。大佬，我守到上氣唔接下氣，你一個唔該做敗家仔送分出去？

講咁耐，結論就係，無論半場定全場，攻守轉換（Transition Defense）真係好緊要，唔做好呢樣嘅，不如咪鬥波累人啦。
有同感嘅，就黎我個Facebook page，响留言到tag一兩個唔守波嘅friend啦～