【Kobe】── 由好唔like到好唔捨得

早兩日係Kobe嘅37歲生日，先前已諗住寫個關於佢嘅post，結果一寫就停唔到，但其實曾經我都幾憎呢個有「最接近Jordan嘅球員」嘅美譽嘅男人。
＿＿＿＿＿＿＿＿＿＿＿＿＿＿


真係比較認真留意NBA，大概係2000年左右，開始會買下《SLAM》嘅台灣版睇，之前淨係會一個禮拜睇一次經已壽終正寢嘅亞視播嘅《NBA地帶》（又，我好憎聽徐嘉樂講波，遲下另文講）。


嗰陣係咩時候？


湖人嘅皇朝年代。


最多人關注嘅，梗係Kobe同埋啱啱嚟完香港嘅巨無霸Shaq啦。另一方面，極受歡迎嘅仲有唯一一個可以响湖人三連霸期間、响湖人主場贏到一場總決賽；百萬軍中如入無人之境嘅嘅常山趙子……呀唔係，係費城Iverson先真。嗰陣T-Mac都未上位，仲係多倫多做老表卡達嘅後備。
我嗰時有種鋤強扶弱嘅心態，非常討厭湖人（所以都唔完全係針對Kobe嘅），覺得O’Neal似住大份蝦蝦霸霸又成日開㬹（Reggie Miller就拍片問過佢，佢仲好霸氣咁直認不諱），仲衰過技安。Kobe就炒粉多過我屋企草落啲散銀，場場都係咁射埋哂啲難度系數9.9分嘅tough shot，真係好惡頂。

到咗04年，另一「開㬹大師」馬龍，仲有「trash talk我至勁、話知你係Jordan」嘅Payton加盟湖人想拎番個尾彩，我對湖人嘅討厭程度亦到達歷史高位。所以睇住活塞徹底擊潰佢哋，實在係大快人心。


幾時開始出現轉變？（注意只係開始，唔係完全）


其實係2003年Kobe衰性侵犯嗰排。唔好誤會，我係講佢响球場上嘅表現。

正常人如果官司纏身，仲飽受輿論壓力，被傳媒追殺，應該唔心理崩潰都精神恍惚。佢呢？唔記得邊個湖人球員响節目到講過，嗰段時間Kobe係經常因為要聆訊而飛黎飛去，好幾次都係嗰頭聆訊完，就即刻滾水淥腳咁去打客場，未熱身就要開波。跟住就有好戲睇啦，佢將所有怒火發洩哂落對手身上，閒閒地拎3、40分。你話係咪傻架？之後佢一再用實力打服我，好似3節拎62分，多過小牛成隊；當然仲有單場81分呢啲壯舉啦，唔到我唔服。

內外線得分技巧同樣純熟兼五花八門、求勝心大到爆燈、職業素養無得輸（佢啲隊友個個都話佢係訓練狂人，佢同Shaq反臉嘅原因之一係佢覺得Shaq太懶），仲有咩呢？佢連防守都係頂級水平！

之但係咁，08年總決賽我都係撐Celtics而唔係佢隊Lakers。後來佢復仇成功，拎多兩次總冠軍我都係唔多老泥，始終先入為主啦。
到咗近幾年見佢傷完一次又一次，為咗入季後賽搏哂老命，就真係開始有種又心痛又可惜嘅感覺。家下佢仲話好大機會打埋下季唔打，停一停諗一諗，陪我大嘅球星仲有幾多個未退役？我都好想見佢下年健健康康、發揮正常，打下明星賽咁，等大家向佢salute。

不過湖人入季後賽嘅機會就好渺茫啦，响西岸45勝都未必入到季後賽，上年湖人先得21勝......反而佢話想2016年打多次奧運，都仲有少少機會，攞多次金牌先光榮退役都算係完美句號。

為咗培訓新人D'Angelo、上季打得好好嘅二年生Clarkson，同幫Kobe慳體力，Byron Scott話來季會放Kobe打小前鋒，甚至大前鋒，等佢係mid post或者low post攞波。我好懷疑可行性有幾高。進攻體力係慳到呀，咁防守呢？球權分配呢？拉住成班後生仔打半場陣地等Kobe落位？除非Scott建立到一個比較完善嘅體系出黎，否則Kobe好可能會打得幾唔高興，變番one man show之餘，新仔又無所成長（唔好唔記得仲有個Randle添呀）。
湖人同Kobe表現會點，我拭目以待！而家都係講番句，Kobe Belated Happy Birthday！

睇完記得Like我嘅page－說籃－呀！