OLE AGENT鞋評: Air Lebron E.E. - By Kent

籃球場 於 24/01/2013 發表 收藏文章
OLE AGENT鞋評: Air Lebron E.E. - By Kent

香港嘅籃孩子,打籃球通常喺街場較多,4年前Kobe IV 嘅誕生打破咗籃球鞋傳統,低筒設計除減輕籃球鞋嘅重量之外,亦深受追求速度嘅籃孩子歡迎。今年冬天,Nike為亞洲地區推出Air Lebron EE,如果大家有留意Nike HK Locker Room嘅網頁,Air Lebron EE有另一個名字叫做『Ambassador Point 5』,為Ambassador系列多加一條價錢相宜嘅副線產品。無論名字係Air Lebron EE或Ambassador Point 5,我諗Nike除咗要打造一對街場鞋外,亦希望可以加上簡約嘅便服鞋感覺,俾大家多一個選擇。以下小弟會為呢對鞋做一個測試報告,俾大家參考。

測試鞋款: Air Lebron E.E. (540795-002)
配色: Black/Photo Blue-White
Size: US9.5
應用技術: 3/4 Full Length Air, XDR
優點: Causal Style + XDR Outdoor

測試背景:
身高:175cm
體重:90kg
位置:SF & PF
打波風格:中遠跳投,駁腳單擋,搶籃板,頂位,藍領球員工作
測試時間:已穿著約2個星期,超過10小時喺室外場打波
測試表現:評分從1-10,10是最高分
外觀造型:5/10

外觀方面,鞋身以Lebron 8 作為骨幹而打造成嘅街場版波鞋,設計上一切以簡約為主,無太多details位,從鞋身和剔嘅位置可以搵到Lebron 8嘅影子,而且喺鞋頭、鞋脷、鞋墊、鞋踭以及鞋底都有Lebron嘅皇冠標記。最特別係,氣墊係藏於鞋墊內而唔係唙鞋身嘅中底位置,整個鞋墊可以完全抽出,情況同Kobe 7 system一樣。
舒適度: 6/10

由於Lebron EE鞋身採用人造皮,透氣能力只屬於普通程度,雖然無侷腳嘅情況出現,但亦未算透氣力強。而中底位置採用3/4 Full Length Air。測試時,回彈力無Lebron 9 Low嘅360 Max Air般強;但穿著時,氣墊給予我嘅緩震感覺確實有驚喜。鞋身亦無刮腳嘅情況發生;鞋籠無偏窄情況出現,所以購買時選取自己碼就可以。
反應性:6/10

束緊鞋帶後,雙腳緊貼鞋身,冇因為跑動而移位。中底採用Air-Sole,鞋身雖然唔似係貼地嘅設計,但絕對無離地感偏高嘅感覺出現;但係反應性只屬普通。
踝部支援:3/10

低筒設計嘅籃球鞋,缺點係對足踝保護性低。雖然 Lebron EE中底本身無額外嘅穩定配備,不過喺測試期間,縱使足踝無高筒保護,鞋身包覆性表現依然平均。
抓地力:7/10

鞋底專為街場而設,採用粗坑魚骨紋,加上XDR嘅物料設計。喺測試中,運球急停、轉向同跳射等動作,抓地力絕對表現優秀。
耐用性:6/10

經過兩星期嘅測試,鞋身已經有明顯嘅摺紋出現。始終人造皮物料不及Hypefuse或 Flywire嘅網面,皮料無網面嘅彈性,回復能力相對較低,所以好容易就會做成摺痕。鞋底採用XDR物料,鞋頭亦註明『For Outdoor Use』,測試後,無發現任何磨蝕/磨損情況發生。鞋身同顏料上嘅QC亦算理想。
重量:7/10

雖然係低筒球鞋,但重量為435.5克;而Lebron 10亦只係446克。主要原因係設計上無採用輕量物料。測試後,感覺雖然唔重,但亦唔可以同其他低筒球鞋如Hyperfuse Low 相比。
性能價錢比較: 8/10

香港推出咗黑藍色和白紅色兩款選擇,零售價為 $549,作為一對標榜廉價嘅街場波鞋,無論作為行街或打球嘅波鞋,擁有3/4 Full Length Air加XDR耐磨鞋底,感覺上絕對稱得上價廉物美。
總結:6/10

外觀造型:5/10
舒適度:6/10
反應性:6/10
踝部支援:3/10
抓地力:7/10
耐用性:6/10
重量:7/10
價格: 8/10

測試Air Lebron EE時有種好特別嘅感覺,一般低筒鞋都會分類為後衛穿著嘅鞋,特點係鞋身輕巧,加上超貼地作為賣點。但經過測試後,個人認為Air Lebron EE完全唔似一般低筒波鞋。鞋身貼地感未至太低、氣墊支援亦好好,當然價格上嘅定位取決於用料上嘅選擇,無Flywire、Hyperfuse嘅技術,但係我相信俾任何位置嘅球員喺街場上穿著,亦係一對好好嘅實戰型波鞋。
Sole Agent簡介:Kent

愛波鞋, 愛NBA, 愛Kobe, 愛Lebron, 但更愛Jordan。實戰球鞋愛好者,鍾意嘗試唔同類型嘅波鞋,打波勁屎,但輸波唔輸鞋!

Name : Kent
身 高 : 1.75cm
體 重 : 90kg
位 置 : SF/PF

標籤: OLE AGENT鞋評  Air Lebron E.E  Kent  

留言


請按此登錄後留言。未成為會員? 立即註冊
    快捷鍵:←
    快捷鍵:→