Trashtalker終結者 石佛退休了 (狂想曲系列)


我鄧肯打咗19年馬刺,從一而終,最興奮嘅唔係拎咗兩個MVP,同埋三個FMVP,而係幫馬剌由零開始,一步一步咁由1999年開始,贏咗五個NBA總冠軍。

諗返我由21歲入行開始,好彩有馬刺另一個傳奇David Robinson一路响我側邊好似阿哥咁教我呢樣嗰樣,我先可以响入行第二年,22歲就贏得我球員生涯嘅第一座NBA總冠軍。 無獨有偶嘅係卡哇依(Kawhi Leonard)又係响22歲就迎來球員生涯嘅最高峰,贏咗隊史第五座嘅NBA總冠軍同佢自己個人嘅FMVP。 好多人問係咪我「石佛」搞到卡哇依佢一啲都唔卡哇依,唧都唔笑吓,真係……關我蛋治咩! 係人都知佢唧都唔笑係因為佢16歲嗰陣佢老豆就無啦啦畀人射死咗,咁你仲覺得佢以後會笑得出咩……

我就唔同,我唧都唔笑係後天培養出嚟嘅。 至於點解,咁唔該你自己問吓Joey Crawford呢位「傳奇」球証喇,大佬……打咁耐波,我都從未聽過笑都要食T-Foul (我仲要係坐响後備席無出場),仲要食T食到畀佢趕離場直返更衣室,結果呢單野畀人講到今時今日都仲講緊,所以從此之後,我都無乜再响場上笑,除非真係好很好笑……

好似上次得鋪蠻勁嘅過氣超人侯活咁,比我搞到佢foul trouble要坐冷板櫈,佢對住我係咁trashtalk,我只好笑出嚟(鄧肯退休話你知 忠誠之重要),真係堅好笑;又好似對上一次Perkins咁,佢同我爭位,結果double technical,佢推咗我一野仲向住我背脊不停係咁鬧,我只好笑出嚟,你咪鬧飽佢囉……

話哂我都揸住個心理學學位,一個笑嘅威力有幾大? 我可以話你知,一個恥笑絕對勁過蕭公子嘅36字粗口真言。 當然,本身你都要有番咁上下江湖地位,個恥笑嘅威力先可以同被恥笑者嘅心靈傷害成正比。 例如,我可以恥笑啲人嘅背籃功同45度刷板波屎,但係侯活就絕對唔可以恥笑人哋啲刷板波同罰球屎,因為咁就會變咗「五十步笑百步」。

而家嘅馬刺雖然無咗我,而柏加仔亦已經漸漸變咗柏加佬、贊路比利都由擁有一頭飄逸嘅秀髮變咗「地中海」,但係馬刺依然十年如一日(正確嚟講係十九年如一日),年年穩入季後賽,所以我都可以安心退落嚟,放手畀班後生接棒。

而家NBA裡面,年資同地位同我差唔多嘅大前鋒,就只係剩番「德國槍」奴域斯基 同「狼王」KG,兩位「老」朋友,我唔等你地喇,錢同戒指我都搵夠嚕,我退休先。

如果喜歡我們的文章,請即分享到︰

標籤: Duncan  Spurs  馬刺  鄧肯  Tim Duncan  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→