米粉頭之骨氣何價 (狂想曲系列)


米粉頭之骨氣何價 (狂想曲系列)
我,人稱「米粉頭」(當然亦有一班巴打鍾情叫我AV男) 嘅華列祖(Anderson Varejao),效力咗騎士足足有12年咁耐,真係可以話親身經歷住騎士由盛轉衰、再由衰轉返盛嘅呢個過程。 點知上半季季中我就突然畀騎士交易咗去拓荒者,跟住就隨即畀拓荒者請食咗隻無情雞,好在呢個世界「有麝自然香」,話哂我曾經都可以打出「14-14-3」嘅全面數據出嚟,所以勇士就隨即挖咗我過去幫佢地拖喇。

結果騎士同勇士今年再次响總決賽狹路相逢,所以我就無端端成為咗NBA史上首位同季效力兩支總決賽隊伍嘅球員……亦即係話,由於我今季大部份時間都係效力騎士,所以無論邊隊贏都好,我都可以不費吹灰之力就拎到隻Iverson同T-Mac都夢寐以求嘅冠軍指環。 Anyway,最後騎士歷史性咁反勝咗我踎緊嘅嗰隊勇士奪冠,我當然有鼻屎咁細嘅不爽,不過從技術層面嚟講,我點都可以有隻鑲咗鑽石嘅冠軍戒指,又駛咩唔happy呢?
但係,內心嘅嗰個我不斷同自己講,我全個總冠軍系列賽平均先出得嗰6分鐘多啲(仲要有一場齋坐冷板凳),如果係勇士拎總冠軍嘅話,我都有丁點唔好意思攞隻冠軍戒指,第時我個仔問我點解會有隻鑲咗鑽石嘅戒指,咁我都可以答佢,老豆我真係有打過總決賽架(雖然打親都係垃圾時間)。 不過如今係騎士贏,我如果都仲咁厚面皮去攞呢隻戒指嘅話,我真係返到去巴西都比江東父老唱到我黃都面哂,我仲駛出嚟行……路嘅! 你問我骨氣值幾錢? 咁我惟有叫你去數吓隻冠軍戒指有幾多粒鑽石囉……


如果喜歡我們的文章,請即分享到︰

標籤: Anderson Varejao  騎士  勇士  

留言


請按此登錄後留言。未成為會員? 立即註冊
    快捷鍵:←
    快捷鍵:→