2018休賽季補強策略 - 休斯敦火箭 精選

大家好，我係籃球宅籃，90後NBA狂迷，醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話，直接入戲肉。處男作先講小弟其中一隊愛隊--休斯敦火箭.

今年火箭成績極其理想，係小弟認為5隊奪冠大熱之一。CP3加入之後令Harden唔洗再一個打5個，少左組織串連球隊既壓力，對手都唔敢只嚴防Harden，加上CP3既防守能力，令迪安東尼既戰術更上一層樓。新加入既防守戰將 P.J Tucker同非洲王子Luc Mbah都已經升為正選，等Eric Gordon可以真真正正做第六人搶分。
不過其實本文重點並唔係想講火箭今季可以點做，因為轉會期已經完左，又已經簽左兩個buyout既球員Joe Johnson 同Brandan Wright。15人季後賽球員名單已經確定，餘下可以做既就係保持球員健康同磨合球隊。

本文重點係想講下來季火箭可以點保持球隊競爭力。今個休賽季火箭其實都幾麻煩，事關有8個球員今年都會變成FA/RFA。其中有兩個球員非常關鍵，一個係CP3，另一個係Clint Capela。

以前半季火箭狀況，CP3已經成功融入球隊，加上奪冠機會比以往係快艇更高，留隊機會好大。新合約應該大概平均3000萬一年。
小弟認為Clint Capela既簽約問題反而比CP3難搞。身為正選中鋒既四年級生Clint Capela今年數據去到14分11籃板，兩項數據都係職業生涯新高。一d重建中而又欠缺中鋒既球隊應該會願意花重金搶人。雖然火箭有權匹配任何offer，但係火箭有個致命傷就係薪酬空間已經所剩無幾。本人預期Capela今年應該可簽到平均1500萬年薪既合約。但係唔排除有其他球隊出毒藥合約，令火箭焗住谷爆薪資帽。
*籃網GM最鍾意出毒藥合約俾RFA從而令母隊簽下溢價合同，過去例子有Allen Crabbe同 Otto Porter Jr.

至於其他球員只可以offer翻差唔多既薪酬。各位可能會奇怪點解T.Ariza人工得8百萬，尤其係響依家呢個大合約年代，佢既人工變相重好似壓低左。無錯，其實本來佢照計應該有過千萬年薪。想知點解攞唔到可以睇下《2018休賽季補強策略 - 特稿 (大合約時代)》。
來季火箭亦都有個好重要既交易要完成，就係賣走Ryan Anderson。其實今年火箭已經想賣走佢，換取cap space去食Camelo張大約，但係無奈無一隊想要佢。Ryan Anderson 今季暫時場均10分5籃板，實在對唔住自己份2000萬合同。若然火箭來季想保留大部份球員，就必須要換走佢，否則就要俾大概4000萬既奢華稅。小弟認為為左換走佢，加入一個甚至兩個1st round draft picks也不為過。一黎未來兩年火箭發揮正常的話都應該可以入季後賽，個pick排位唔會好高。二黎迪安東尼打開8人輪換(希望下半季可以加到10人輪換啦），就算俾你揀到個好新秀都未必有上陣時間。目前火箭有2019年到2024年既1st round，算叫做keep得幾好。只要吸引到一隊under salary cap既重建中球隊肯要就可以。下季暫時有15隊球隊低於salary cap，其中有7隊係重建中，成功換走既機會都唔細。

暫時未知Tarik Black會唔會留隊，雖然佢屬於輪換名單之一，但係只係場均10分鐘，有可能離隊爭取更多上陣時間。若然兩者都離隊，火箭大概重有200萬薪酬空間，即係一張老將底薪合約或兩個二輪選秀合約。如果Ryan Anderson交易案中會換到球員翻黎，其實俾硬稅。不過今季火箭可以係唔俾luxury tax既情況下打出成績，相信新班主應該都肯泵水既。
今集講住錦多先，下回再續。