【交易現場】打造馬刺模式2.0 76人一日連挖馬刺兩助教

空談籃板 於 07/06/2019 發表 收藏文章
多間美國傳媒引述消息指76人聘用原馬刺助教Ime Udoka 以及 Cameron Hodge 分別作為球隊助教同球員發展教練 。

Udoka 球員時代曾經為馬刺、拓荒者等多隊效力,係一個防守力強悍嘅側翼。2012年退役後加入馬刺教練團隊,長年處於Greg Popovich兩旁,可以話係Coach Pop嘅入室弟子之一。7年馬刺助教生涯中,Udoka 最大嘅功績就係成功幫助球隊喺2012年暑假羅致當季自由市場中最炙手可熱嘅LaMarcus Aldridge。 Udoka 將會接替Monty Williams 擔任76人首席助教,成為師兄Brett Brown麾下第二交椅。
Cameron Hodge 過去三季都喺馬刺任職球員發展助教。Hodge 曾經喺2016年成為拉脫維亞國家隊嘅助教,以便為馬刺監察當時準備引入嘅Davis Bertans嘅表現。而今季表現大幅躍升嘅Derrick White 同 Bryn Forbes 都係 Hodge 嘅代表作。


作為Popovich得意弟子嘅Brett Brown,自2013年「走馬」上任76人總教練以嚟,都一直堅持重點發展年青球員,希望可以複製馬刺時期嘅發展模式。苦心經營下開始漸見成效﹐球隊成績近兩季都打入季後賽第二圈。其實名宿Elton Brand 喺2018年接任76人總經理後不斷透過後台操作為球隊進行換血,希望可以令球隊更快成熟﹑完成重建,今次教練團嘅變動亦被視為Brand加速球隊方針變革嘅措施。


馬刺隊方面,年屆70歲嘅Popovich不久前坦言來季好可能係自己最後一季作為球隊總教練,過往幾年都一直都為自己嘅引退作交接準備。而Udoka 聯同Ettore Messina、Becky Hammond 此前都係外界盛傳接棒嘅大熱人選,如今Udoka同Hodge嘅離去相信將會對馬刺教練團造成一定嘅動盪。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→