2018休賽季補強策略 - 費城76人

籃球宅籃 於 17/03/2018 發表 收藏文章
大家好,我係籃球宅籃,90後NBA狂迷,醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話,直接入戲肉。第五集接住講下東部新貴--費城76人。

Trust the process!今年76人終於步入收成期。自2013球季認真擺爛之後,第一次打入季後賽。Joel Embiid 同 Ben Simmons 兩個第一季合作就已經有如此效果,相信只要兩位保持健康,76人往後幾年都可以保證季後賽席位。
不過今夏76人既制服組都幾忙下。雖然只有四位球員完約,分別係 J.J Redick,Amir Johnson,Ersan Ilyasova 同 Marco Belineli。但係其實76人重有好多野要做。一,增加三分射手;二,招攬穩定既後備中鋒;三,招攬多個大前鋒;四,平衡一下後場人手。

今季續約既重點球員一定非J.J Redick莫屬。今季場均16.6分,為隊中第二高。全靠佢係外線既威脅,Joel Embiid先可以減少被內線夾擊,Ben Simmons先可以無後顧之憂地鏟籃。所以雖然Redick已經係一位年屆33歲既老將,但係係隊內既重要性完全不亞於兩位新星。今年Redick既人工高達兩千三百萬。可幸既係Redick亦有意續長約,減薪留隊應該無問題。不過以上季佢係快艇既730萬年薪去估算,再參考Kyle Korver同Lou Williams下季既人工,無奈地講新約年薪應該只有八百萬至一千萬。若果76人願意以Pau Gasol個價去續約,Redick應該會開心到彈起,畢竟佢其實係今季前從未試過有過一千萬年薪。

今季76人場均只命中10.6球三分波,屬聯盟中段班。由於兩位當家球星都欠缺穩定外線,增加外圍射手勢在必行。76人九成半既三分波都係黎自5位球員,分別係 JJ Redick,Dario Saric,Jerry Bayless,Robert Covington同 Marco Belineli。

二月加盟76人既Marco Belineli係其中一個穩定外圍射手。教練Brett Brown都幾重用佢,場均25.7分鐘可以得到11分,效率唔錯。若然下季願意以老將底薪留隊,可以確保76人輪換陣容深度。

至於Amir Johnson,個人認為留隊機會不大。雖然加盟時已經有明確定位,就係 Joel Embiid既保險。但係到目前為止,Amir Johnson既上陣時間依然寥寥可數,場均只有15分鐘。今年30歲既Amir Johnson以佢既身手應該仍然可以係一D下游球隊擔任正選中鋒,所以小弟認為佢留隊機會不大。

個人認為 Emeka Okafor 或者 Boban Marjanovic 或者係 Tyson Chandler 呢類有身高優勢又有內線防守震懾力既球員會比較適合76人。個人底線攻籃能力唔需要高,進攻時純粹係內線攞身位,等對方唔敢全出外線防守或者mark死個控衛。

35歲既 Emeka Okafor 今季事隔三年重返NBA賽場。貴為2004年榜眼同最佳新秀,職業生涯場均12.8分9.8籃板1.7阻攻,能力一d都唔差。只可惜係2013年發現頸椎椎間盤凸出,被迫休養。今季係鵜鶘既表現雖然未如以往突出,但係效率仍然唔錯,上陣16.7分鐘有6.2分5.5籃板1.4阻攻。另外,若然有留意開76人既比賽,你會發覺76人反輸既情況頗常見。個人認為係球員經驗太淺,往往係比賽尾段出現太多失誤;領先十幾分之後放鬆,俾對方追翻之後又唔識應對。適當地加入老將有助傳授經驗之餘又可以係緊張關頭穩定軍心。以Emeka Okafor今季既表現,預計今夏都應該不乏追求者,人工大概係老將底薪至中產合約。Emeka 曾經效力過76人既發展聯盟球隊Delaware 87ers,希望有加分作用。

至於Boban Marjanovic 同Tyson Chandler兩位下季雖然仍然有約在身,但係兩隊都係重建階段,只要叫價唔好太誇張,我覺得76人都可以一試,尤其係手頭上已經有太多選秀權。

今季76人只有兩個大前鋒,分別係Dario Saric 同Ersan Ilyasova,陣容深度明顯不足。季中加盟既Ersan Ilyasova有身材優勢同一定既三分能力,不過防守方面略嫌失色。今夏續約與否要睇季後賽表現同開價幾多。

不過無論如何,76人都要簽多個PF增加深度。人選方面有Michael Beasley, Rudy Gay, Carmelo Anthony同Julius Randle。四位球員今夏都有球員選項或者成為FA/RFA。當中首推既當然係近期大爆發既Julius Randle。前文《2018休賽季補強策略 - 洛杉磯湖人》已經講過今季佢既表現有幾亮眼,呢度唔再多講了。我覺得76人應該趁著下季仍有五千萬薪酬空間既情況下出重金去搶佢。以平均年薪二千萬去搶佢,搶到的話可以大大增加PF位置深度,令到佢同Dario Saric有良性競爭;搶唔到既話亦可以佔用湖人一大部份薪酬空間,一舉兩得。

個人黎講其次選擇會係Carmelo Anthony。今季Carmelo係雷霆既場均得分同命中率都去到生涯最低。不過其實都無可厚非,已經唔再係隊中當家既佢無以往禁多起手機會。今夏有提早解約權既佢若然跳出合約,76人有絕對條件去滿足佢既年薪要求,不過只限一年短約。都係個句,家有一老,如有一寶,多一個老將在陣真係可以令隊波醒目D。再加上呢位老將係一個攞過3屆奧運金牌,10次入選全明星賽既球員,淨係一齊訓練都學到唔少野啦。諗起76人個陣加埋Carmelo Anthony都真係幾好J。

至於Michael Beasley同Rudy Gay呢兩位球員,雖然球風完全相反,但係有穩定得分,人工又唔貴,簽翻黎做輪換球員綽綽有餘。

最後一樣76人要做既就係解決一下後場人滿為患既問題。下季76人暫時有4個PG 3個SG,其中健康既Ben Simmons同 Markelle Fultz 都可以有能力擔任正選控衛。預計下季76人有部份時間會打雙控衛,不過兩位球員都欠缺射術,有無機會做到火箭既CP3同哈登既效果,真係要下季先知。不過今夏76人有兩個首輪選秀權同三個二輪選秀權,即係又有機會有新後衛,真係打多4個波都唔夠用。Markelle Fultz下季復出後,T.J. McConnell同 Jerry Bayless既上陣時間又會被分薄。76人真係要諗下點樣令整體陣容實力提升,唔可以再好似以前禁一味囤積新秀。舉個例,可以用T.J. McConnell,Jerry Bayless,Timothe Luwawu再加今夏76人既First Round Pick同Second Round Pick去換快艇既Patrick Beverley同 Lou Williams。一黎後場輪換球員即刻升級,二黎可以free多個位出黎簽由湖人攞翻黎既2018首輪新秀。看似好似要犧牲好多,但係依家76人D選秀權多到可以組多隊波,放棄一兩個選秀權問題不大。

好彩76人面對住既都算係幸福既煩惱,隊中無溢價合約,兩位當家又後生,重要有大量選秀權同薪酬空間,令到隊波調整陣容既彈性好大,唔似得騎士灰熊雷霆勇士呢幾隊波禁綁手綁腳。

雖然小弟一向都唔係76人既球迷,但係76人既天賦之高令到我今季都睇多左76人既比賽。希望76人既兩位當家可以成為長年搭檔,俾D耐性,唔好好似Penny同Shaq,夾幾年就因為薪金問題或者係隊中地位問題而分手。

留言


請按此登錄後留言。未成為會員? 立即註冊
    快捷鍵:←
    快捷鍵:→