2018休賽季補強策略 - 猶他爵士

籃球宅籃 於 27/04/2018 發表 收藏文章
大家好,我係籃球宅籃,90後NBA狂迷,醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話,直接入戲肉。第十七集接住講下西區球隊--猶他爵士。

今季猶他爵士既表現令好多人都大跌眼鏡,相信季前冇人會估到爵士會有禁好成績。Gordon Hayward離隊後,爵士陣中就連一個全明星球員都無。能夠係西區既軍備競賽中突圍而出,除左有賴新秀Donovan Mitchell驚人既表現外,季前以一個首輪選秀權由木狼交易得來既Ricky Rubio亦非常關鍵。有趣既係,當時交易所用既首輪選秀權,正正係黎自雷霆。

對於爵士既球迷黎講,除左應該為球隊表現鼓掌之外,亦都要讚球隊總經理Dennis Lindsey (又一馬刺出品)既操作。下季爵士既薪資空間非常充裕,大概剩餘3300萬美元。同時大部份主力都重有約在身,全隊只有Derrick Favors,Dante Exum同Raul Neto將會約滿。球隊重要手持自家2018年既首次輪選秀權,以季後賽球隊黎講實在難得。目前16支季後賽球隊中只有一半擁有自家2018首輪選秀權。不過爵士近年好少培育自己挑選既新秀,由2013年至今所揀選既8名首輪新秀中,只有Dante Exum一位仍在陣中 (Donovan Mitchell 係由金塊交易得來)。

對於爵士管理層黎講,今夏最重要既操作一定係續留Derrick Favors。呢位效力爵士已經七季半既正選大前鋒,今季繼續交出好表現,場均上陣28分鐘得12.3分7.2籃板1.1阻攻。2013年同爵士簽訂一份4年4800萬合約,性價比相當高。今年先26歲既Derrick Favors 預計會受到不少球隊青睞,爵士要留住佢免不了花費重金,大概1800萬年薪左右,僅次Rudy Gobert既2350萬。之前曾經傳出Derrick Favors唔會續留爵士,但球員之後於Twitter表示並非屬實。熟真熟假要等到今夏先知道,不過若然Derrick Favors最終真係離隊,個人認為拓荒者既Ed Davis會係一個合適既選擇。現時爵士既體系中,強調內線球員協防同保護籃板既能力,並唔要求佢地有強大既內線進攻技術。爵士另一內線球員Rudy Gobert都係以防守見稱,場均得分只有13分,可見隊內球員分工明確,球隊風格與季後賽對手雷霆大相逕庭。今年28歲既Ed Davis雖然場均只上陣19分鐘,但已經有5.3分7.4籃板既成績,常規賽防守效率亦同Derrick Favors非常相近。Ed Davis今季薪金只有約600萬,新合同大概落於1000萬年薪左右,相對Derrick Favors會佔用較少薪酬空間,有助球隊後季有更多銀彈續留Ricky Rubio。唯一疑慮係Ed Davis加盟後能否融入爵士體系,擔起更重大既防守任務。

2014年第五順位新秀Dante Exum會於今夏成為受限制自由球員。近四季一直未能爭取穩定正選席位,更因為受傷缺席大部份賽事,四年下來只上陣162場。今季只上陣過14場,對於新合同既人工增加不少未知數。加上隊中重有另一年輕控衛Raul Neto會於今夏完約,爵士有機會二揀一從而驣出位置予今年既新秀。數據上Dante Exum當然略勝一籌,但係其健康狀況確實令人擔心,新合同好可能因而增加獎金比例,令球隊有更多保障,底薪則大概於800萬左右。

今夏爵士擁有第21順位既首輪選秀權,希望球隊可以好好利用,發掘符合球隊體系既潛質新人。來季西區只會更加恐怖,爵士必須要加倍努力,否則金塊快艇好有機會取而代之打入前八席位。

留言


請按此登錄後留言。未成為會員? 立即註冊
    快捷鍵:←
    快捷鍵:→