克里夫蘭騎士: 三場過後, 三點評論

NBA大排檔 於 22/10/2017 發表 收藏文章
騎士開季至今打左三場比賽, 一場小勝, 一場完勝, 一場慘敗。
現階段評論騎士最後可以走幾遠實在言之尚早, 但三場波過後, 騎士球團要考量既問題最少有三個。

1. 控衛問題 - Jose Calderon 只係另一個 Deron Williams?


今年騎士最後釋出 Richard Jefferson, 簽下 Jose Calderon, 有不少球迷都質疑呢個決定。但於 I. Thomas 仍在養傷期間, 正宗控衛只餘下 D Rose 一員, 實在難以令人放心。主因當然係 D Rose 既傷病史難免令人懷疑佢全季可否全勤。如果唔簽 Jose Calderon, plan B 會係 35 歲既 D Wade 重操 Rookie Year 既故業? 還是 James 超人般繼續瞻前顧後?

所以球團簽下 Calderon 實在不難理解。而 D Rose 於開季第二場不幸傷出亦某程度上反映球團作對了決定。但有趣既地方係, 頭兩場場事, Calderon 幾乎係冇上過場, 而今日所謂作為正選, 亦好快被收起。再出場既時候, 已經係大落後既垃圾時間。

第一節 Calderon 打出極為基本既控衛表現。但防守上既速度同對抗性明顯跟不上比賽節奏。Lue 將佢收起, 實在合理不過。

睇完呢場比賽, 筆者諗返起上年季後賽, Deron Williams 被矮化成不可用之兵。今日對著非爭標份子既魔術, Calderon 已經非可用的話, 咁佢既作用長遠真係高度成疑。

2. Love 中鋒的好與壞


Love 打中鋒, 於進攻層面上, 簡單而言最大好處就係場上五位球員都有射三分既能力, 可以完全拉開對手防線。但防守上, 則帶來一定問題。

Love 由出道以來, 保護籃框能力之弱, 可以話係人所共知。雖則過去兩年防守企位有明顯進步, 但始終稱不上係一個 Rim Protector。當中鋒保護籃框能力有限, 外圍防守球員既協防壓力會大增。因為大家都知道如果「關閘」唔成功, 果球會輸左九成。而外圍球員協防亦必然會令對方外圍投射有更多空間。今早魔術既 48.6% 三分投射命中率, 可以話係完美示範。

Love 打中鋒, 簡單啲講, 外線防守球員一定要左仆右撲。但唔好忘記今年騎士後場球員既年紀......(還有身高不足六呎的 Thomas)


3. 看不見盡頭的單打。

打完三場比場, 騎士完全不欠單打既畫面。三場過後, 場均助攻數字係19.7。上年常規賽, 隊制助攻數字尾二果隊係太陽隊, 場均19.6。


小結, 賽季仲有漫漫長路, 但筆者認為, 如果呢三個問題搵唔倒答案既話, 挑戰冠軍可以說是免談。
標籤: #CAVS  #NBA  # KEVIN LOVE  

留言


請按此登錄後留言。未成為會員? 立即註冊
    快捷鍵:←
    快捷鍵:→