2018休賽季補強策略 - 聖安東尼奧馬刺

籃球宅籃 於 29/03/2018 發表 收藏文章
大家好,我係籃球宅籃,90後NBA狂迷,醉心研究各NBA球隊補強或重建策略。個人終極FF目標係可以加入NBA球隊Front Office參與組隊決策。

唔講太多廢話,直接入戲肉。第十集接住講下西區強權--聖安東尼奧馬刺。

近期馬刺真係氣勢如虹,一波六連勝將球隊再一次打入前八位置。實不相瞞,三月初時筆者其實唔睇好馬刺,一黎因為 Kawhi Leonard 受傷缺陣,二黎係馬刺既賽程實在太艱巨,三月既14場比賽當中有11場既對手都係分岸前八名。估唔到馬刺一班球員個個都打出水準,尤其係主將 LaMarcus Aldridge,六連勝其間場均32.2分真係carry全隊。目前只淨低七場比賽既情況下領先第九位既快艇2.5場勝差,季後賽資格尚算樂觀。

其實筆者一直都躊躇緊應該如何分析馬刺既補強策略。有睇過小弟之前既文章既話,大概都知道本人其實係以球員數據去分析薪酬水平同去留問題,儘量希望用客觀角度解構各支球隊應該如何補強。但係馬刺就係一支好特別既球隊,放眼各個運動聯賽,好少見到一支球隊可以長年位於競爭前列之餘,重可以凝聚到強大既球員向心力。

NBA球隊既陣容調整相對其他運動隊伍都比較大,主要原因係隊伍球員數目小,只要一季換走五個球員,新球員已經佔全隊三成。呢個問題對於球隊既化學作用同戰術運用都非常大影響,球員對球隊既忠誠度亦有可能減少。

但係馬刺既球員可以完全無視呢項因素,甚至乎願意減薪留隊去令球隊有更大空間去調整陣容。現時馬刺既15位球員若然願意離隊,都保證可以獲得一份更高薪既合約。但係馬刺既球員就係忠心耿耿,除非球隊作出交易,否則都唔願意離開。同時亦係因為呢個原因,小弟好難以球員數據作出合理嘅薪酬推斷,所以今次小弟可能會較少提及球員新約薪水,希望各位見諒。

去番正題,今夏馬刺一共有7名球員會完約或可以跳出合約。擁有球員選項既分別有 Danny Green,Rudy Gay同 Joffrey Lauvergne。休賽季完約既就有 Tony Parker,Kyle Anderson,Davis Bertans同Bryn Forbes。其中Tony Parker,Danny Green同 Kyle Anderson 都極大機會留隊,問題只係年薪幾多,所以下文並唔多提啦。

今夏馬刺首要既操作就係續留Rudy Gay。今季多以後備上陣既佢場均上陣時間去到生涯最低既21.5分鐘,亦都因為咁導致到所有數據都跌至谷底。其實Rudy Gay既得分效率依然好高,係馬刺隊中得分第三高既球員。加盟馬刺前只做過38次後備,但係今季已經做左43次後備。Greg Popovich 現時較喜歡起用Kyle Anderson為正選,但係佢真係欠奉得分能力。年屆40歲既Manu Ginobili 今季得分都高過佢就知佢有幾誇張。小弟明白Greg Popovich 想培育新秀既原意,但係當Kawhi Leonard下季回歸,馬刺要係季後賽突圍而出就必須依靠Rudy Gay呢類球員幫手搶分。今夏馬刺要留佢,就一定要保證到佢正選大前鋒既位置,否則以佢既能力,轉隊去其他季後賽球隊做正選兼攞千萬合約都綽綽有餘,無必要留係馬刺做後備。

其餘三位球員Joffrey Lauvergne,Davis Bertans同Bryn Forbes都係屬於第三梯隊既成員,場均上陣時間分別排係隊中11至13位。其實三人既效率都尚算唔錯,加上後生 (只有24-26歲)同平 (現時係底薪合同),續留三人本身並無問題。但係來季馬刺將會有一個首輪選秀權以及一個次輪選秀權,以目前己額滿既球員名單黎睇,除非球隊作出交易,否則必須係Davis Bertans同Bryn Forbes兩人當中作取捨。(Joffrey Lauvergne係有球員選項,冇得幫佢話事)

若然要從兩人當中揀一個留,我會揀留低Bryn Forbes,主要原因係Manu Ginobili極有可能打埋下季就退役,馬刺必須要為SG補充足夠輪換球員。加上相比起Davis Bertans,Bryn Forbes可預見上陣既機會會較多。

當然啦,若然Manu Ginobili季後選擇退役,馬刺就唔需要煩惱留邊個好。但係以Manu Ginobili今季既表現,打多年絕對冇問題,希望佢唔好咁快退休啦。馬刺球迷亦都耐心D靜候主將Kawhi Leonard既回歸。

留言


請按此登錄後留言。未成為會員? 立即註冊
  • Kenneth Tam 於 29/03/2018 評論 NO. 1

    其實你講左咩補強?只不過講左原陣有咩人可以留咩人可以唔留?新人呢?呢叫分析?

快捷鍵:←
快捷鍵:→